Komîsyona Edaletê ya ji bo Rojîn û Platforma Jinan a Îzmîrê (İKP) ji bo ronîkirina mirina bi guman a Rojîn Kabaîş, bi şîara “Di meha 18an a kuştina Rojîn de em di nav liv û tevgerê de ne” meş û daxuyaniyeke çapemeniyê ya girseyî li dar xistin.
Gelek jin li ber Pirtûkxaneya Penguen a Alsancakê hatin cem hev û ber bi Navenda Çandê ya Turkan Saylan ve dest bi meşê kirin. Di meşê de pankarta “Rojîn tam 18 meh in li benda edaletê ye. Telefonê vekin! DNA aîdê kî ne aşkera bikin! Kujeran darizînin!” hat hilgirtin. Di dema meş û daxuyaniyê de jinan bênavber dirûşmên wekî; “Rojîn Kabaîş sedema raperîna me ye”, “Kujeran neparêzin, darizînin” û “Mêr dikuje, dewlet diparêze” berz kirin.
‘Delîl tên veşartin, pêvajo tê dirêjkirin’
Di çalakiya ku hejmareke zêde ya jinan beşdar bû de, metna daxuyaniyê li ser navê platformê ji aliyê Hayal Taşdan ve hat xwendin. Hayal Taşdan bal kişand ser ku 18 meh in daxwaza malbatê û jinan a ji bo edaletê bê bersiv dimîne û got: “18 meh in mirina bi guman a Rojîn Kabaîş nayê ronîkirin û lêpirsîneke bi bandor nayê meşandin. Delîl tên veşartin û pêvajo bi zanebûn tê dirêjkirin. Malbata Rojîn bi awayekî sîstematîk tê tehdîtkirin û jinên ku têdikoşin jî bi dezenformasyonê tên sûcdarkirin. Lê em dizanin ku her rastiya di dosyaya Rojîn de derketiye holê DNAyên du mêran ên li ser bedena wê jî di nav de bi saya têkoşîna jinan hatine aşkera kirin.”
Daxuyanî bi berzkirina dirûşman bi dawî bû.
