Piştî têkçûna hevdîtinên Amerîka û Îranê, Serokê Amerîkayê Trump biryar da ku deryaya li dor Îranê dorpêç bike. Endamên NATOyê piştgirî nadin vê biryarê.
Hevalbendên NATOyê ragihandin ku ew ê beşdarî plana dorpêçkirina Tengava Hurmuzê ya Serokê Amerîkayê Donald Trump nabin. Ev biryar, ku ji aliyê Ingîlistan û Fransayê ve nehatiye erêkirin rageşiya di hundirê tifaqê de gihand asta herî jor.
Starmer: Em naxwazin tev li şer bin
Serokwezîrê Ingîlistanê Keir Starmer ji BBCê re axivî û helwesta Londonê bi awayekî zelal diyar kir. Starmer got: “Em piştgiriya ablukayê nakin. Biryara min pir eşkere ye; çi zext li ser me hebe jî, em ê ber bi şer ve neyên kişandin.” Ev daxuyanî piştî ku Trump duh fermana dorpêçkirina benderên Îranê dabû, hat dayîn.
Plana Macron ya ji bo mîsyoneke pirneteweyî
Serokkomarê Fransayê Emmanuel Macron jî da zanîn ku ew li şûna ablukayê, li ser avakirina mîsyoneke parastinê ya pirneteweyî dixebitin. Macron diyar kir ku ew ê bi Brîtanya û welatên din re konferansekê li dar bixin da ku ewlehiya derbasbûna keştiyan li Hurmuzê peyda bikin. Tê payîn ku ev civîn roja Pênşemê li Parîs an jî Londonê pêk were û nêzî 30 welatî (wekî Hindistan, Yûnanistan, Îspanya û Îtalya) beşdar bibin.
Gelo Trump mîsyoneke wiha dixwaze?
Dîplomatên Ewropî têkildarî mijarê gumanên xwe tînin ziman û dibêjin gelo Trump ê niha tengavê wekî “amûreke zextê” bikar tîne, dê destûrê bide mîsyoneke serbixwe yan na. Çavkaniyekî dîplomatîk ê Fransî jî got ku Trump niha berjewendiya xwe di girtina tengavê de dibîne, dê mîsyoneke navneteweyî qebûl bike?
Pêşeroja NATOyê
Ev nakokiya li ser Tengava Hurmuz piştî gefên Trump yên ji bo vekişîna ji NATOyê, fikarên li ser paşeroja hevpeymanê zêdetir kirine. Dema ku Washington daxwaza piştgiriyê dike, Parîs û London bi nêzîkatiya “em ne alîgirê tu aliyên şer in” hewl didin rêyeke sêyemîn bibînin. Ev yek fikarên ser pêşeroja peymanê zêde dikin.
