Colemêrg – Dikandar Serhat Çogaz, sembolên Colemêrgê li magnet, kilîldank, plaket û hwd dinexşîne. Serhat Çogaz di heman demê de pêlavan jî difiroşe û navê gundên Colemêrgê li pêlavên ku difiroşe dike.
Li navçeya Geverê ya Colemêrgê dikandar Serhat Çogaz ku pêlavan difiroşe, navên gundên Colemêrgê li pêlavan kiriye. Serhat Çogaz bi navê “Sureya” magnet çêkirine û belgeya tescîlê jî hilgirtiye. Çogaz, 11 sembolên herêmî yên Colemêrgê li ser van magnetan dinexşîne û difiroşe. Her wiha ew kilîldank (anahtarlık) û plaketan jî çêdike û armanca wî danasîna sembolên Colemêrgê ye. Ev xebatên wî gelek bala mêvan û geştiyaran jî dikişîne.
‘Ji çandê heta bîranînê’
Serhat Çogaz ê ku hezkirîyê bajar û zimanê xwe ye, bi lêv kir ku ew vî karî weke parastina çanda herêmê dibîne û got: “Wek hûn jî di zanin geştiyar û çiyager tên vir, gelek kes dibin mêvanên me, lê dest vala diziwirîn û wek bîranîn tiştê ku bikirin kêm bûn. Her bajarekî nîrxên wê hene, me jî cihê ku dîrokî kirine magnet. Colemêrg paytexta çiyayan e û sembola Colemergê guldexwîn e. Me magnet û polyestirên guldexwîna çêkirin, her wiha me plaket çêkirin. Magnetên me ji yazdeh cureyan pêk tê. Xeynê magnetan em kilîdankên ku Colemêrge tînin bîra mirov çêdikin. Kesê ku bixwaze cureyek cuda magnet bê çêkirin, em li wir amade ne û em ji her fikrekê re vekirîne. Dirûşma me ‘ji çandê heta bîranînê’ ye. Di magnetên me de kar û xebatên dayika, keda jinê, wateya govendê, cihên xwezayî û dîrokî yên weke Spîxane, Qesra Şemzînan, Pira Bêgirê, Pira Berberekê nexşandîne. Pêşerojê de em ê magnetên pezkovî û dengbêjan jî çekin.”
Navê gundên Colemêrgê li pêlavan kiriye
Serhat Çogaz diyar kir ku wî navên gundên Colemêrgê li pêlavên difiroşe kiriye û wiha got: “Min navê her gundekî Colemêrgê li destek pêlavê kir. Em çûne fuara solan li Stenbolê û min dît li wir danasina solan bi navên bajarên Ewropî yên weke Oslo, Edinburg, Tokyo hwd.tên kirin. Ez jî fikirîm çima em navên gundên xwe lê nekin û min jî her solekê navê gundekê lêkir. Min xwest ku zimanê Kurdî bila nemir be û milet jî bila navê gundan bizane. Dema milet jî dibîne kêfxweş dibe. Her wiha min li solên ziwistanê jî navên mîna bahoz, bager, birûsk ên rewşa hewa nîşan dide, lê kir.”
