Tora Mafê Mirovan a Kurdistanê ragihand ku di meha borî de kolberek jiyana xwe ji dest da û 2 kolber jî birîndar bûn.
Tora Mafê Mirovan a Kurdistanê bîlançoya meha Çileyê ya mirin û birîndarbûna kolberên Kurd belav kir. Hate diyarkirin ku di meha Çileyê de kolberek Kurd li sînorê Bane ya Rojhilatê Kurdistanê jiyana xwe ji dest da û 2 kolber jî li sînorê Serdeşt û Merîwan birîndar bûn. Li gorî agahiyan, kolberê Kurd ê bi navê Idrîs Nadirî li sînorê Bane ya Rojhilatê Kurdistanê ji serma jiyana xwe ji dest da.
Hate destnîşankirin ku kolberê bi navê Şahîn Resûl Pûr li sînorê Serdeşt di encama gulebarana raste rast a hêzên rejîma Îranê de birîndar bû, her wiha kolberê bi navê Mihemed Reîsî jî li sînorê navçeya Merîwan di encama êşkencekirin û lêdana ji aliyê hêzên rejîma Îranê ve birîndar bû. Hêjayî gotinêye ku di sala 2024’an de 51 kolberên Kurd li Rojhilatê Kurdistanê di encama êrişên hêzên rejîma Îranê û sedemên cuda cuda jiyana xwe ji dest dan.
Rêxistina Mafan: Îranê di 2024an de 63 kolber kuştin
Li gorî Rêxistina Mafê Mirovan a Kurdistanê leşkerên rejîma Îranê di 2024an de 63 kolberên Kurd kuştin û 233 kolberên Kurd jî di gulebaran û êrişa raste rast de birîndar kirin. Hate destnîşankirin ku ji ber astengî û rêgiriyên rejîma Îranê ya li pêşiya rêxistin û çalakvanên mafê mirovan di şopandin û lêkolînkirina binpêkirinên li Rojhilatê Kurdistanê, bîlançoya pêwîst nehatiye komkirin.
TMMK: Rejîma Îranê di 2024an de 51 kolber kuştin
Tora Mafê Mirovan a Kurdistanê di rapora 2024an de destnîşan kiribû ku Rejîma Îranê di 2024an de li herêmên sînor ên parêzgeha Urmiye, Bane, Serdeşt, Pawe û Kirmanşan 51 kolberên kurd kuştin û 246 kolber jî birîndar kirine.
Kolbarnewsê: Di 13 salan de 681 kalber kuştin
Di sala 2012an de 43 kolber mirin, 51 kolber birîndar bûn. Di sala 2013an de 43 kolber mirin, 31 kolber birîndar bûn. Di sala 2014an de 44 kolber mirin û 58 kolber birîndar bûn. Di sala 2015an de 38 kolber hatin kuştin û 51 kolber jî birîndar bûn. Di sala 2016an de 29 kolber hatin kuştin û 29 kolber birîndar bûn. Di sala 2017an de 66 kolber hatin kuştin û 88 kolber birîndar bûn. Di sala 2018an de 58 kolber hatin kuştin û 152 kolber birîndar bûn. Di sala 2019an de 86 kolber hatin kuştin û 170 kolber birîndar bûn. Di sala 2020î de 67 kolber kolber hatin kuştin û 174 kolber jî birîndar bûn. Di sala 2021an de 75 kolber hatin kuştin û 153 kolber jî birîndar bûn. Di 2022an de 49 kolber hatin kuştin û 176 kolber jî birîndar bûn. Di sala 2023an de 39 kolber hatin kuştin û 195 kolber jî birîndar bûn. Di sala 2024an de 44 kolber hatin kuştin û 400 kolber jî birîndar bûn.
