Amed – Hevserokê DBPa Amedê Mehmet Şîrîn Gurbuz diyar kir ku ji bo xewn û xeyala aştî û azadiyê ya gelê Kurd pêk were ew mitînga “Aştî û Azadiyê” li dar dixin û got: “Divê gelê me bi helwest û daxwaza xwe navekî li pêvajoyê bike.”
Rêxistina DEM Partiyê û Rêxistina Partiya Herêmên Demokratîk (DBP) ên Amedê bi hevkarî mitînga bi dirûşma “Aştiya Civakî û Azadiyê” li dar dixin. Mitîng 8ê Sibatê saet di 12.00an de li Qada Îstasyonê tê lidarxistin. Ji navenda Amedê heta ber bi gundan ve xebat û amadekariyên mitîngê berdewam dikin. Hevserokê Giştî yê DEM Partiyê Tuncer Bakirhan û Hevserokê Giştî yê DBPê Keskîn Bayindir dê wek axivêr beşdarî mitîngê bibin. Tê payîn mitîng bi girseyî bê lidarxistin û peyamên girîng bên dayîn.
Komîteya Amadekar a Mitîngê jî xebatên xwe bênavber didomîne. Hevserokê Rêxistina DBPa Amedê û endamê Komîteya Amadekar a Mitîngê Mehmet Şîrîn Gurbuz têkildarî mitîngê ji ajansa me re axivî.
‘Hesreta aştî û azadiyê’
Mehmet Şîrîn Gurbuz destnîşan kir ku gelê Kurd bi sedsalan e bi hesreta azadî û aştiyê dijî û wiha got: “Em jî wek gelê Kurd dixwazin li welatê xwe bi jiyanek azad, serdest û wekhev bijîn. Di vî warî de mitînga me ya 8ê Sibatê li Qada Îstasyona Amedê bi slogana ‘Aştî û Azadî’ heye. Em ê dengê Kurdan bigihînin hemû cîhanê. Em ê daxwaza gelê xwe ya aştî û azadiyê carek din ji dinyayê re ragihînin.”
‘Em meşa azadiyê bigihînin armanca wê’
Mehmet Şîrîn Gurbuz bal kişand ser hevdîtina li gel Rêberê PKKê Abdullah Ocalan û peyamên wî û wiha domand: “Birêz Ocalan di hevdîtinên dawî de jî peyamên aştî û azadiyê da. Em jî dibêjin li ser bingeha van peyamên aştî û azadiyê, em meşa xwe ya azadiyê mezin bikin. Em dixwazin bi vê mitîngê meşa azadiyê bigihînin armanca wê. Lewma ev mitînga me ya li Amedê girîng e. Em dixwazin hemû gelê Amedê, gelê Kurd û bindest deng bidin vê mitîngê da ku dengê vê mitîngê li hemû cîhanê belav bibe.”
‘Divê êriş bên sekinandin’
Mehmet Şîrîn Gurbuz da zanîn ku li aliyekî pêvajoya aştiyê tê axaftin li aliyê din ve jî her roj qeyûman tayîn dikin û rojnamevanan digirin û her wiha li dijî gelê Rojava êriş û komkujî tên kirin û got: “Ev durûrtî nabe. Hewce ye ev êriş bên sekinandin.”
‘Em bi daxwaz û helwesta xwe navekî li pêvajoyê bikin’
Mehmet Şîrîn banga beşdariya mitîngê li gelê Kurd kir û wiha got: “Hewceye ji gundan bigire heta navenda Amedê û hemû bajarên derûdora Amedê gelê Kurdistanê beşdarî vê mitîngê bibe. Em bi coşek xurt tev il mitîngê bibin. Mitîng û peyamên di mitîngê de bên dayîn muhîm e. Pêwîste gelê were mitîngê û bi daxwaz û helwesta xwe navekî li vê pêvajoya tê birêvebirin bike.”
Bakirhan û Bayindir dê biaxivin
Mehmet Şîrîn Gurbuz diyar kir ku wê Hevserokê Giştî yê DEM Partiyê Tuncer Bakirhan û Hevserokê Giştî yê DBPê Keskîn Bayindir wek axivêr tev li mitîngê bibin.
