Rêveberiya nû ya Meclîsa Jinan a Şaredariya Peyasê civîna yekem li dar xist. Di civînê de hat diyarkirin ku xebatên wan ên ji bo parastin û pêşxistina mafên jinan dê bênavber û bi coşeke mezin berdewam bikin.
Meclîsa Jinan a Şaredariya Peyasê ya ku herî dawî rêveberiya xwe nû kiribû, civîna xwe ya yekemîn a berfireh li Mala Kevirîn a ku li Parka 75’an e, li dar xist. Hevşaredara Peyasê Bêrîvan Gulşen Sîncar, endamên meclîsa şaredariyê, alîkarên hevşaredaran û endamên Meclîsa Jinan beşdarî civînê bûn.
Xurtkirina hevgirtin û rêxistinbûna jinan hat nirxandin
Di civînê de ji bo mezinkirina feraseta rêveberiyên herêmî û pêkanîna pergaleke wisa ku jin bikarin di her qada jiyanê de bi awayekî wekhev, azad û çalak cih bigirin, nirxandin hatin kirin. Di heman demê de bal kişandin ser girîngiya xurtkirina hevgirtin û rêxistinbûna jinan a li navçeyê.
“Gotin, ked û îradeya jinê dê diyarker be”
Endamên Meclîsa Jinan a Şaredariya Peyasê diyar kirin ku ew ê têkoşîna avakirina jiyaneke demokratîk, ekolojîk û azadîxwaz a ku gotin, ked û îradeya jinan tê de diyarker be, her awayî bimeşînin. Beşdaran bi biryardarî tekez kirin ku xebatên wan ên ji bo parastin û pêşxistina mafên jinan dê bênavber û bi coşeke mezin berdewam bikin.
