“Desthilatdar ji pênus û kamerayên ragihandina azad ditirse. Hedefgirtina Rojnamevan Azîz Koyluoglu plankirî bû û girêdanbûna xwe bi hevdîtina Iraq û Hakan Fîdan re heye. Emê wek şagirtên şehîdan hîn zêdetir têbikoşin û heta dawî emê şopdarê heqîqetê bin.”
Armanc Herekol
Yek ji pêşengê Ragihandina Azad, rojnamevan Azîz Koyluoğlu di 27ê Mijdara 2025an de li herêma Ranya ya ser bi Silêmaniyê ve, di encama êrişeke hewayî ya dewleta Tirk de şehîd bû. Têkildarî şehîdxistina Rojnameger Azîz Koyluoglu û êrişên li ser endamên ragihandina azad Rojnamevan Weysî Tallî ji Ajansa Welat (AW) re peyivî.
‘Roj nîne êrişî ragihandina azad nekin’
Weysî Tallî di destpêka axaftinên xwe de, di şexsê Rêhevan Nazim, Cîhan, Gulistan, Hêro û Ezîz de tevahî şehîdên ragihandina azad bi rêz û minetdarî bibîr anî û got: “Ez li ber keda wan bejna xwe ditewînim. Di van demên dawî de operasyonên taybet li ser rojnamevanên ragihandina azad tên plankirin. Li Bakurê Kurdistanê girtin û êşkence heye, li Başûrê Kurdistanê tên qetilkirin û girtin. Li Rojava jî heman şêwazî tên hedefgirtin û qetilkirin. Ragihandina azad rastiya heyî ji bajar bigire heta çiya û gundan ji raya giştî re parve dike û bûye dengê gelê bindest. Rol û mîsyonek mezin li ser milê ragihandina azad heye. Roj nîne rojnamevan rastî êrişan neyê.”
‘Desthilatdar ji rastiyê ditirse’
Rojnamevan Weysî Tallî bal kişand li ser tirsa desthilatdaran a li beranberî ragihandina azad û wiha pêde çû: “Rojnamevan ji ber nûçe û rastiya heyî, rastî êrişan tên û ji aliyê dagirkeran ve tên qetilkirin. Em van êrişan bi tûndî şermezar dikin. Em dizanin, desthilatdar ji rastina ragihandina azad ditirse. Ragihandina azad nebe wê gel bê bîr û hiş bimîne. Ragihandina desthilatdarê rastiya heyî nade. Zilm û dagirkeriya heyî ji aliyê ragihandina desthilatdaran ve rewa tê dîtin. Ji ber vê yekê jî di pêvajoyên wiha girîng de ragihandina azad rolê xwe dileyîze. Ji Bendava Tişrînê bigire heta Herêmên Parastina Medyayê, ragihandina azad li ser kare. Rojnamevanên jin di hedefa desthilatdarê de ye. Em dibînin ku ragihandina desthilatdaran dixwaze ragihandina azad bêdeng bikin. Lê ev yek bi ser nakeve. Wê timî ragihandina azad rastiyê ragihîne.”
‘Ji bo rastiyê canê xwe feda kirin’
Weysî Tallî di berdewamiya axaftinên xwe de fedayîtiya rojnamevanên azad vegot û destnîşankir ku endamên ragihandina azad bi fedakirina canê xwe xebat dikin û wiha dirêjî da axaftinên xwe: “Cîhan, Nazim, Gulistan û Hêro bi fedakirina canê xwe rastiya heyî ji me re ragihand. Mamostayê me yê hêja Ezîz Koyluoglu ku rastiya Başûrê Kurdistanê radigihand, hate hedefgirtin. Hedefgirtina rêhevalê me Ezîz îspat dike ku ragihandina azad rolek çiqas mezin dileyîze. Dijmin tengav bûye û êrişî hemu beşên civakê dike. Di warê hiquqî de ev êrişên li ser ragihandina azad sûce. Ev di qada navnetewî û zagonî de nayê qebulkirin. Lê mixabin heta niha jî bêdengiyek heye.”
‘Şopdarên rêya heqîqetê bûn’
Herî dawî Rojnamevan Weysî Tallî wiha qala kesayeta şehîdên ragihandina azad kir: “Ez bi Şehîd Nazim, Gulistan, Hêro û Ezîz re jiya me. Me bi hev re kar kiriye. Kesayetên pir bi hêja û dilsozê welatê xwe bûn. Hertim ji bo civaka xwe kar dikirin û heta kêliyên jiyana xwe ya dawî şopdarên rêya heqîqetê bûn. Emê wek şagirtên wan hîn zêdetir xebat bikin. Dema ku êrişî Rêheval Ezîz hatî kirin, Hakan Fîdan bi Iraqê re hevdîtin dikir. Girêdanbûna xwe bi hev re hene. Em bêdengiya Iraq û YNK’ê jî şermezar dikin. Divê Iraq û YNK demildest li dijî van êrişan bibin xwedî helwest. Ji xwe PDK diyare bi dijmin re kar dike. Divê rojek ji ya din zutir dawî li van êrişan bê û mafê rojnamevanên azad bên parastin.”
