Li gorî daneyên Ajansa Nûçeyan a Hawarê (ANHA), Dewleta Tirk di êrîşên hewayî yên bi SÎHAyê ku di 2 mehan dawî de li dijî kantona Firatê pêk anîn de 18 xwendekar û mamoste kuştin. 8 kes jî birîndar bûn. Di van êrîşan de gelek dibistan jî wêran bûn.
Ji 8ê kanûna 2024an heta niha Dewleta Tirk bi SÎHAyan êrişên li dijî Herêma Bakur û Rojhilatê Sûriyeyê, bi taybet li dijî gundewarê Kobanê û herêma Bendava Tişrînê yên kantona Firatê, zêde kirine. Dewleta Tirk û komên paramîlîter bi balafirên şer û yên bêmirov û çekên giran saziyên xizmetguzarî wekî stasyonên av û kehrebeyê kirin armanc û li dijî welatiyan bi taybet li gundewarê Kobanê komkujî pêk anîn. Di encama van êrişan de, bi dehan dibistanê hatin rûxandin û bi sedan xwendekar ji xwendinê mehrûm bûn. Di van êrîşan de 18 xwendekar û mamoste hatin kuştin û 8 jî birîndar bûn. Têkildarî mijarê Desteya Perwerde û Fêrkirinê ya Rêveberia Xweser a kantona Firatê li ser malpera xwe ya fermî hevdîtina bi hevserkê desteyê Ehmed Ehmed re kiribû parve kir. Ehmed Ehmed anî ziman ku dewleta Tirk a dagirker dibistanên seretayî kirin armanc.
Dibistanên bajarê Kobanê yê kantona Firatê ku ji ber êrişan zirar dîtine ev in;
Dibistana Xirûs a li başûrê bajarê Kobanê ku ew dibistana seretayî ye, ji qatekê pêk tê û bi temamî hat rûxandin.
Dibistana Cada Mexare ya seretayî ya li başûrê rojavayê Kobanê ya ku ji 2 qatan pêk tê, bi temamî hat rûxandin.
Dibistana Til El Ebir a seretayî ya li rojavayê bajarê Kobanê ya ku ji 2 qatan pêk tê, di qata jor de bi awayekî beşî zirar dîtiye.
Li bajarê Sirînê yê kantona Firatê jî dibistana Dîkan ku dibistaneke seretayî ya ku ji jorekê pêk tê, bi temamî hat rûxandin.
Ehmed destnîşan kir ku di encama hedefgirtina dibistanan û hilweşîna wan de hişt ku bi sedan xwendekar ji xwendinê bêpar bin. Wê yekê bandorek neyênî li pergala perwerdehiyê ya kantona Firatê kir.
