Hevserokê ARSÎSAyê Tûncer Taşkan ku li Erdîşê xebatên zimanê kurdî dimeşînin, bi boneya 21ê Sibatê Roja Zimanê Dayikê ya Cîhanî bernameyek li dar xist û got: “Daxwaza me ya statuya neteweya kurd û zimanê kurdî û perwerdehiya bi kurdî xeta me ya sor û jêneger e.”
Komeleya Navenda Lêkolînên Ziman, Çand û Hunerê ya ARSÎSAyê ku li navçeya Erdîş a Wanê xebatên zimanê kurdî dike, bi boneya 21ê Sibatê Roja Zimanê Dayikê ya Cîhanî di avahiya xwe ya li ser Cadeya Ozdemîrhan Oglû ya Erdîşê bernameyek amade kir. Rêveberên Komeleyê bermame pêk anî. Ewil di bernameyê de Koma Dengê ARSÎSA kilamên dengbêjiyê gotin û piştî kilaman daxuyanî dan. Di daxuyaniyê de pankarta “Em perwerdehiya bi zimanê Kurdî dixwazin” vekirin. Hevserokên ARSÎSAyê Merve Keleş û Tûncer Taşkan û gelek welatî tev li bernameyê bûn.
Hevserokê ARSÎSAyê Tûncer Taşkan metna daxuyaniyê xwend û wiha got: “21ê Sibatê Roja Zimanê Dayikê ya Cîhanî ye. Ev roj ji aliyê UNESCOyê ve di sala 1999an de wek ‘Roja Zimanê Dayikê’ hatiye ragihandin. Ji wê rojê heta niha ‘Roja Zimanê Dayikê ya Cîhanî’ li her derê cîhanê dikeve rojevê, girîngî û wateya vê rojê tê diyarkirin û derbarê girîngiya zimanê dayikê de çalakiyên cur bi cur tên lidarxistin. Em hemû kurdên azadîxwaz jî bi salan e bi armanca parastin û azadiya zimanê kurdî û hemû zimanên din ne tenê 21ê sibatê, her roj di nava têkoşîneke domdar de ne. Em gelek zelal dibêjin ku; daxwaza me ya statuya neteweya kurd û zimanê kurdî û perwerdehiya bi kurdî xeta me ya sor û jêneger e.”
