Çalakiyên 8ê Adarê li gelek qadan didomin. Jinên di nav partiyên siyasî û saziyên li Bakûr û Rojhilatê Sûriyeyê cîh digirin, bi boneya 8ê Adarê çalakî lidar xistin û peyama “Em bi hev re bihêz in” dan.
Li seranserê Bakur û Rojhilatê Sûriyeyê ev demek e çalakiyên bi mebesta 8ê Adarê Roja Jinên Kedkar ên Cîhanê tên lidarxistin. Bi boneya 8ê Adarê platforma çalakiyên hevpar ên rêxistinên jinan li bajarê Hesekê, serdana sazî û hêzên leşkerî yên jinan kirin û diyarî li wan belav kirin. Li Qamişloyê şahî hat lidarxistin. Her wiha jinan li Kobanê jî komxebat lidarxistin.
Hesekê
Kongra Star serdana sazî û hêzên leşkerî yên jinan kir û diyarî li jinan belav kir. Di çarçoveya çalakiyê de jinan serdana Fermangeha Jîngehê ya bajare Hesekê, Mala Jinan, Kongra Stara Hesekê, Partiya Sûriya Pêşerojê, Hêzên Parastina Civakî HPC-JIN û Asayîşa Jinê kirin û bi pîrozkirina 8ê Adarê diyarî dan sazî û hêzên Leşkerî yên jinan. Endama kordînasyona Malên Jinan ên Bakûr û Rojhilatê Sûriyeyê Rîma Îsa, 8ê Adarê li tevahî jinan pîroz kir û banga hevgirtina jinan li tevahî Sûriyeyê kir. Piştre jinan bi dirûşmeya ‘Jin Jiyan Azadî ‘û gerandina dîlanê 8’ê Adarê li hev pîroz kirin.
Qamişlo
Li bajarê Qamişlo ya Kantona Cizîrê ya Bakur û Rojhilatê Sûrîyeyê, li stadyuma 12ê Adarê bi pêşengiya Yekîtiya Jinên Ciwanên û Yekîtiya Xwendekarên Welatparêz, bi boneya 8ê Adarê, bi beşdariya sedan jinan şahiyek hat lidarxistin. Di nav şahiyê de pêşangehek jî hat nîşandan. Piştî deyeqek rêzgirtinê, li ser navê Yeîitiya Xwendekarên Welatparêz a Qamişloyê Elîsa Şêxo axivî û got: “Roja 8ê Adarê ji bo me rojeke girîng e. Emê bi nasnameya jinê 8ê Adarê pêşwazî bikin û xwedî lê derkevin. Bi felsefeya Rêber Apo rêya 8ê Adarê, li tevahî jinan vebû. Emê xwedî li vê felsefeyê derkevin. Em vê roja pîroz li Rêberê xwe pîroz dikin û em dibêjin em ê heta dawî xwedî li nasnameya xwe û felsefeya Rêber Apo derkevin.”
Paşê Koma Şehîd Delîla sitran gotin û Koma Helbestvan jî helbestan xwendin.
Şahî bi govendê berdewam kir.
Kobanê
Partiyên siyasî û Rêveberiya Xweser a Bajarê Kobanê jî, komxebatek ji bo hemû jinên di saziyan de kar dikin, li dar xist. Jin bi cil û bergên Kurdî tevlî komxebatê bûn. Di komxebatê de li ser mijarên wekî girîngiya şoreşa jinê, Qonaxa destpêkê û pêşketina tevgera jinan û rola jinan a di siyasetê de, nîqaş hatin kirin. Komxebat bi dirûşmeya “Felsefeya Jin Jiyan Azadî ber bi Sûriyeke demokratîk ve” pêk hat.
Piştî deqeyek rêzgirtina ji bo cangoriyên azadiyê, endama Rêveberiya Desteya Ciwana a Bajarê Kobanê Avşîn Misto axivî. Avşîn da zanîn ku ev komxebat li ser navê Koordînasyona Jinê ya Rêveberiya Xweser tên darxistin û di bin dirûşmeya “Bi felsefeya Jin Jiyan Azadî ber bi Sûriyeke demokratîk ve” ji du beşan pêk tê.
Beşa yekem ji aliyê Hevseroka Desteya Ekolojîk Almaz Romî ve hat pêşkêşkirin. Almaz Romî, li ser Şoreşa jinê û guhertinên wê yên di nava Rojhilata Navîn de axivî û wiha got: “Pêşketinên jinan ku di cîhanê de û di Rojhilata Navîn de pêk tên bingeha xwe ji dawiya sedsala 19’dan distînin. Di wê demê de jinê dixwest tevlî wî şerî bibê û cihê xwe di nava şer de bigre û mafê xwe bistîne. Mafê xwe di aliyê siyasî, xwendin, kar û her wiha di her alî de dixwest bistîne. Jinan dixwestin ku xwe bi pêş bixin, lê ew kaosên ku di wê demê de derketin, nedihiştin ku jin xwe bi pêş bixe.”
Komxebat bi beşa duyemîn berdewam kir.
