Amed – Welatiyên tev li civîna gel a Amedê bûn têkildarî banga Rêberê Gelê Kurd Abdullah Ocalan axivîn. Welatiyan diyar kirin ku dê ji bo azadiya fizîkî ya Rêberê Gelê Kurd Abdullah Ocalan têbikoşin û gotin: “Em bi Rêber Abdullah Ocalan bawer in.”
Şandeya Îmraliyê ya DEM Partiyê di 27ê Sibatê de “Banga Aştî û Civaka Demokratik” a Rêberê Gelê Kurd Abdullah Ocalan ji rayagiştî re aşkere kir. Piştî banga dîrokî li Kurdistan û Tirkiyeyê gelek daxuyaniyên piştgirtiya bangê hatin dayin. Partiya Wekhevî û Demokrasiyê ya Gelan (DEM Partî) ji bo girîngî û weteya bangê bide famkirin biryar da ku 100 civînên gel pêk bîne. Civînên gel ên li ser pêvajoyê li Kurdistan û Tirkiyeyê berdewam dikin. Her roj bi welatiyan re dicivin û li ser peyama Rêberê Gelê Kurd Abdullah Ocalan nirxandinan dikin. DEM Partiyê di 12ê adarê de li Salona Çand Amedê ya Bajarê Nû ya Amedê civîn li dar xist. Gelek welatî tev li civînê bûn. Welatiyên ku tev li civînê bûn têkildarî banga Rêberê Gelê Kurd Abdullah Ocalan ji Ajansa Welat (AW) re axivîn.
‘Divê tevahî gelê me li vê bangê xwedî derkeve’
Welatî Kerîma Okûtûcû diyar kir ku banga birêz Abdullah Ocalan gelek giring e. Em bangê hêvîdar in û wiha got: “Hêviya me ev e ku dê tiştên ku di bangê de têne xwestin pêk bên. Bi hezaran mirov hatin kuştin, girtin û koçber bûn. Pêwist e ku bersivên van tiştan bê dayîn. Birêz Abdullah Ocalan gav avêt. Divê dewlet jî li gorî vê gavan biavêje. Eger bersiv neyê dayîn pêvajo namêşe. Niha rêyek li pêşiya me heye. Ez dixwazim tevahî gelê me li vê rêyê xwedî derkevin.”
‘Divê pêvajo li gorî rêbazên Abdullah Ocalan bimeş e’
Hisên Erzî bibîrxist ku birêz Abdullah Ocalan her dem xwestiye ku ev pirsgirek bê çareserkirin û wiha axivî: “Brêz Abdullah Ocalan berê jî gelek caran xwest vê pêvajoyê bide destpêkirin. Divê mirov fikr û rêmanê birêz Abdullah Ocalan bimeşe û li gorî vê xwedî vê pêvajoyê derkeve. Birêz Abdullah Ocalan di salan berê de jî dixwest bi aliyê hiqûqê vê her tişt bimeşe. Niha giring e ku ev pêvajo di nava gel de bên nîqaşkirin, lêkolîn bên kirin ku encama vê pêvajoyê bê girtin. Divê gel û dewlet birêz Abdullah Ocalan fêm bike, ji ber ku pêvajoyên berê nehat femkirin pêvajo ne gihiştin armanca xwe. Divê bi rêbazên Rêber Abdullah Ocalan ev pêvajo bê pêşxistin. Baweriya kesan ji Tirkiye, Îran, Sûriye û Irakê re nemayê. Lê hêj ji şer berdewam dike. Girtin û kuştin berdewam dike. Divê dewlet di rojan pêş de gavan biavêje û birêz Abdullah Ocalan azad bibe. Hêviya me pêvajoyê heye. Êdî divê ev xwîn bisekine. Divê gelê me ye ku bi salan e ked danê xwedî li pêvajoyê derkevin.”
‘Birêz Abdullah Ocalan gav avêt niha dora dewletê ye’
Cengîz Yakut da zanîn ku daxwaza gelê kurd her tim ser aştiyê bû û wiha got: “Avakirina aştiyê gelek zehmete. Lê em bawerin ku pêvajo dê bike armanca xwe. Ji xwe gelê kurd her tim destê aştiyê dirêj kiriye. Divê tevahî sazî, partiyên sîyasî û civak vî barî bide ser milê xwe. Bangawaziya birêz Abdullah Ocalan ji bo gelê kurd û tevahiya cîhanê gelek giring e. Tevahiya gelê kurd û Tirkiyeyê piştgirî didin pêvajoyê. Birêz Abdullah Ocalan gav avêt niha dora dewletê ye. Em bi biryar in û em ê li pêvajoyê xwedî derkevin.”
