Hevseroka Giştî ya DEM Partiyê Tulay Hatîmogûllari diyar kir ku têkildarî hevdîtina bi MHPê re dê piştre daxuyaniyeke berfireh bidin. Cîgirê Serokê Giştî yê MHPê Semîh Yalçin jî got: “Hevdîtineke baş bû.”
Partiya Wekhevî û Demokrasiyê ya Gelan (DEM Partî) piştî banga dîrokî ya Rêberê Gelê Kurd Abdullah Ocalan, dest bi serdanên partiyên siyasî kiribû. Di vê çarçoveyê de şandeya DEM Partiyê bi MHPê re li odeya MHPê ya li Meclisê hevdîtin kir. Di şandeya DEM Partiyê de Hevserokên Giştî yên DEM Partiyê Tulay Hatîmogûllari û Tuncer Bakirhan, Serokwekîlê Meclisê yê DEM Partiyê Sirri Sureyya Onder û Serokwekîla Koma DEM Partiyê Gulistan Kiliç Koçyîgît cih girtin.
Piştî hevdîtinê, Tulay Hatîmogûllari û Semîh Yalçin daxuyanî dan.
Pêşî Tulay Hatîmogûllari axivî û got: “Me têkildarî banga MHPê û birêz Abdullah Ocalan û pêvajoyê hevdîtin kir. Em ê daxuyaniya xwe ya berfireh piştî bidawîbûna hevdîtinên îro parve bikin. Em spasiya şandeya MHPê dikin ku mazûvaniya me kir. Heke tenduristiya birêz Devlet Bahçelî baş bûya ew ê îro di hevdîtinê de amade bûya. Lê belê ji ber ku tenduristiya wî rê neda, me bi şandeya wî peywirdar kiribû re hevdîtin kir. Em careke din silametiyê û şîfa xêrê jê re dixwazin.”
Semîh Yalçin jî wiha got: “Weke MHPê em ê daxuyaniyekê nedin. Lê dixwazim hûn tenê bi vê bizanibin, hevdîtineke gelek baş bû.”
