Serekwekîlê Koma Partîya DEMî Gulîstan Kiliç Koçyîgît û Sezaî Temellî û zafê wekîlê DEMî Meclîs de polîtîkayê qeyûm, şer û tecrîdê ser Rayberê PKKî Abdullah Ocalanî şermezar kerdê
Wekîlê partîya DEMî yê Meclîs de polîtîkayê qeyûm, şer û tecrîdê ser Rayberê PKKî Abdullah Ocalan şermezar kerdê, wekîlan hetanî Berê Şerefî ya Meclîsî meşîya û dowîzê “Qeyûmî ra nê, demokrasî” û “Hemserekî xeta ma ya mor a” akerdê. Çalakî de Serekwekîlê Koma DEMî Sezaî Temellî vat ke ê bi çalakîya xo sûcê înan teşhîr kerdê, çimkî bi tayînê qeyûmî heqê weçînayişê şarî xesp kenê.
Ma tepa gam nêerzenê
Sezaî Temellî aşkera kerd ke wa her kes bizano ke ê qatî verba polîtîkaya lêşînan de tepa gam nêerzenê û wina vat: “Bi qeyûman tena şaredarîyê ma xesp nêkenê. Ma do heme warî de heqê xo yê demokratîke bipawê. Ma verba qeyûman de bivinderê, wa zîhnîyetê şerwaşt bizano ke bi şerî ameyoxê nê welatî çînyo. Sûrîye de aştî, aştîya Tirkîyaye ya, no ser ganî bi Kurdan aştî bêra viraştiş. Ma verba zîhnîyetê lêşîn de bi Tirk û Kurd pîya do têkoşîn bidê.”
Temellî tewr peynî dîyar kerd ke eke berê Îmralîyî biabê û Abdullah Ocalan qise bikero do omidê aştîye Tirkîyaye de berz bibo. Peynîya qiseyî wekîlan çalakîya rûniştişî kerdê.
