KASEDê 2yemîn Pîrozbahiya Newrozê ya ji bo danasîna cil û bergên Kurdî yên herêmên Kurdistanê li dar xist. Di şahiyê de cil û bergên 23 herêmên Kurdistanê hatin danasîn.
Komeleya Çand, Huner û Wêjeyê ya Jinan (KASED) bi armanca rasthatina Cejna Newrozê 2yemîn Pîrozbahiya Newrozê bi dirûşma “Agirê Newrozê bi ronaghiya rojê geş dibe” danasîna cil û bergên Kurdî ango netewî yên Kurdistanê li dar xist. Şahî li qonaxek Sûrê hat lidarxistin. Bi sedan welatî tev li şahiyê bûn. Bênavber dirûşma “Jin jiyan azadî” hat berzkirin.
Beriya şahiyê Seroka KASEDê Salîha Ayata axaftinek kurt kir û behsa naveroka bernameyê kir.
Piştre Koma Govendê ya Jinan a KASEDê govendên herêmên Kurdistanê gerandin û hemû beşdaran ji govendê re li çepikan dan.
Danasîna cil û bergên Kurdistanê
Paşê danasîna cil û bergên bajarên Kurdistanê kirin. Di danasînê de cil û bergên 23 bajar ango herêmên Kurdistanê hatin danasîn. Ewilî danasîna cil û bergên Amedê hatin kirin. Danasîna cil û bergan bi cilên Rojava qediya. Dema ku cilên Rojava hatin danasîn, her kesî bi çepik û lîlandinê piştgirî da Rojavayê Kurdistanê. Bi piranî jinek û mêrek bi hev re li ber stranan hatin nav şahiyê û cil û bergan dan nasîn. Di dema danasîna de kêfxweşiya beşdaran jî hêjayî dîtinê bû.
Dû re hemû mankenên ku cil û bergan dan nasîn, bi hev re hatin nav şahiyê û govend gerandin.
Piştî danasînê Dayikên Aştiyê û aktîvîstên TJAyê agirê Newrozê pêxistin û li dora agir govend gerandin.
Şahî bi konsera stranbêj Şîlan Dora û gerandina govendê bi dawî bû.
