Hempîşeyên Rojnameger Nûjiyan Erhan a di 3yê Adara 2017an de li Xanesora Şengalê di êrîşa çekdarên PDKê de birîndar bû û piştre jiyana xwe ji dest da, li ser gora wê ew bi bîr anîn.
Rojnameger Nûjiyan Erhan 3yê Adara 2017an di encama êrîşa çeteyên Roj ên ser bi PDKê ya li hember civaka Êzidî, li ser rêya navbera Sinûn û Xanesorê de hate suîkast kirin û bi giranî birîndar bibû. Nûjiyan Erhan di 22yê Adara 2017an de şehîd bû. Ji ber keda wê ya ji bo civaka Êzidî li goristana Şehîd Dilgeş û Şehîd Berxwedan a Şengalê hate veşartin.
Rojnamegerên li Şengalê û endamên TAJÊ, di 8emîn salvegera şehadeta Rojnameger Nûjiyan Erhan de çûn ser gora wê û ew li ser gorê bibîr anîn. Şopdarên xeta Nûjiyan û dayikên Şengalî gul birin ser gora şehîd Nûjiyan û bi daxuyaniyekê şehîd Nûjiyan bi bîr anîn. Li ser navê ragihandina azad a jinên Êzidî Bêrîvan Çiya di bîranînê de axivî û diyar kir ku şehîd Nûjiyan yek ji rojnamevanûn ku di dema fermanê de xwe ji çiyayên azad berda Şengalê bû û got: “Şehîd Nûjiyan ji bo rastiya civaka me û dayikên Êzidî bide xuyakirin bêtirs berê xwe da Şengalê. Di wê demê de gelek zehmetî hebûn, lê ev ji bo şehîd Nûjiyan nebûna astengî û xwe gihand Şengalê. Yek ji hedefên wê yê esasî ew bû ku jinên Êzidî li Şengalê ragihandina ava bikin. Em wek rojnamevanên jin li ser xeta şehîd Nûjiyan dimeşin.”
Bêrîvan Çiya wiha berdewam kir: “Di dîrokê de gelek ferman hatine serê me lê tu ferman wek a sala 2014’an di cîhanê de nehatiya naskirin. Bi saya şehîd Nûjiyan û hevrên wê hate naskirin. Şehîd Nûjiyan ne tenê di meşandina karê çapemeniyê de xwe di her tiştekî berpirsiyar didît. Ew bi jin û civaka Êzidî re dibû alîkar. Niha li Şengalê bi dehan dayikan navê Nûjiyan li keçên xwe kirine. Îro li Şengalê bi dehan jinên ciwan ên Êzidî kamera û pênûsa şehîd Nûjiyan hilgirtine û li ser xeta wê kar û xebatên xwe berdewam dikin.”
Piştre li ser navê TAJÊ’yê Berfê Eliyas axivî. Berfê Eliyas di şexsê şehîd Nûjiyan de tevahiya şehîdên têkoşîna azadiyê bi bîr anî û anî ziman ku şehîd Nûjiyan keça vê civakê bû û got, “Şehîd Nûjiyan ji bo civaka me canê xwe feda kir. Em wê mîna yek ji civaka xwe dibînin û ji malbata wê re dibêjin bila dilê we rehet be, em şehîd Nûjiyan ji bîr nakin.”
Bîranîn bi dirûşma “Şehîd namirin” bi dawî bû.
