Serokê Giştî MHPê Devlet Bahçelî têkildarî banga dîrokî ya Rêberê Gelê Kurd Abdullah Ocalan nirxandinên nû kir û got: “Bi reformên berfireh divê em yekîtiya xwe ya mîlî hîn xurt bikin, edalet û wekhevî divê esas be.”
Serokê Giştî yê MHPê Devlet Bahçelî ji rojnameya Turkgun re axivî û got: “Piştî banga 27ê Sibatê milet di nava bendewariyeke bi hêvî de ye. Di destê me de ye ku em vê hêviyê neşikîne û veguherînin kêfxweşiyê. Tirkiyeya bê teror wê bibe Tirkiyeyeke welê ku demokrasî lê hîn xurt e. Di demekê de ku sîstemeke nû ya cîhanê ava dibe, mirov dikare vê pêşketinê ji bo Tirkiyeyê bikin firsendek.”
Dewlet Bahçelî anî ziman ku ev pêvajo dê ji bo afirandina jiyaneke civakî û siyasî ya nû ya aştiyane ya Tirkiyeyê bibe wesîle û ev nirxandin kir: “Guherînên mezin li gel firsendan, xwedî rîsk in. Ji ber vê yekê gelek dînamîk divê bi baldarî bêne birêvebirin. Beriya her tiştî weke ku di banga Îmraliyê de hate kirin divê destpêkê çek bêne danîn, PKK kongreya xwe bi lez kom bike, biryara tasfiyekirina hemû pêkhateyên PKKê bikeve meriyetê. Bi reformên berfireh divê em yekîtiya xwe ya mîlî hîn xurt bikin, edalet û wekhevî jî divê esas be.”
Bahçelî got, “Bi destûreke bingehîn a mîlî û berfireh bermahiyên darbeyê dikarin ji holê bêne rakirin” û wiha lê zêde kir: “Ya girîng ew e ku avaniyeke welê bê avakirin ku her kes xwe di nav de bibîne. Lewma di pêvajoya Tirkiyeya dûrî ji terorê de em bang li hemû welatiyên xwe dikin ku bi feraseta ‘Beriya her tiştî Tirkiye’ û ‘Her kes dibe Tirkiye’ di yekîtî û biratiyê de bigihêjin hev, paşerojeke pîroz a Tirkiyeyê bi hev re ava bikin.”
