MKG û DFGê rojnamevan Evîn Bûldan ku 8 sal berê bi krîza dil jiyana xwe ji dest dabû, li ser gora xwe ya Geverê bi bîr anî.
Nûçegîhana Rojnameya Azadiya Welat Evîn Buldan a di sala 2017an de li Amedê ji ber krîza dil jiyana xwe ji dest da, di 8emîn salvegera wefata xwe de li ser gora xwe ya li Goristana Bajêrge ya navçeya Gever a Colemêrgê hat bîranîn. Di bîranînê de pankarta “Em te jî bîr nakin” vekirin. Bapîrê Evîn Buldan Necdet Buldan, xizmên malbatê, endamên Komeleya Rojnamegerên Jin ên Mezopotamyayê (MKG), Komeleya Rojnamegeran a Dîcle Firatê (DFG), Meclîsa Dayikên Aştiyê ya Geverê, rêveberên Partiya Wekhevî û Demokrasiyê ya Gelan (DEM Partî) û Partiya Herêmên Demokratîk (DBP) ên Gever û Colemêrgê, Parlamenterê berê yê HDPê yê Colemêrgê Sait Dede û gelek kes tev li bîranînê bûn.
‘Me ev mîrateye ji Evînê hilgirtiye’
Girseyê bi deqeyekê rêzgirtinê dest bi daxuyaniyê kirin. Ewilî li ser navê MKGê Rûken Polat axivî û diyar kir ku Evîn Buldan mîrateya xwe ya heqîqetê ji wan re hiştiye. Rûken Polat, anî ziman ku wan jî ev mîrateya Evînê girtiye û got: “Me soza rastiyê da hemû şehîdên çapemeniyê. Em şopdarên vê mîrateya ku ji Evîn Buldan heta Gulîstan Tara, ji Gulîstan heta Hêro Bahadînî, ji Hêro Bahadînî heta Cîhan Bilgin têkoşiyane ne. Girîng e ku li vir careke din vê yekê destnîşan bikin, têkoşîna heqîqetê ti carî bêdeng nabe. Em soz didin ku em ê vê mîrateyê bigihînin cihên herî bilind.”
Dûre li ser navê malbatê bapîrê Evîn Bûldan, Nejdet Bûldan axivî û xêrhatina girseyê kir. Nejdet Bûldan bal kişand ser têkoşîna Evînê û got ku jiyana Evînê jiyana Kurdistanê bû. Nejdet Bûldan hemû şehîdên çapemeniya azad bi bîr anî û axaftina xwe bi dawî kir.
‘Cihê çapemeniya azad gelek cuda ye’
Hevserokê DEM Partiyê yê Geverê Ercan Sevmez jî bal kişand ser giringiya çapemeniya azad û diyar kir ku ew hemû şehîdên çapemeniyê bi rêzdarî û minetdarî bi bîr anî. Ercan Sevmez wiha got: “Cihê çapemeniya azad di têkoşîna azadiya Kurd de her tim cuda bûye. Çapemeniya azad li cihekî ku berpirsyariyên dîrokî hildigire ser xwe. Li cihekî ku her tim vê şoreşa heqîqetê, têkoşîna azadî û demokrasiyê dixe pênûsa xwe. Em ê her tim li cihekî ku têkoşîna demokrasî û azadiyê ya ku bi çapemeniya azad re tê meşandin hembêz bike. Banga Aştî û Civaka Demokratîk xeyala azadiyê ya Evîn û jiyana wê ye.”
Piştî axaftinan girseyê qûrnefîl danîn ser gora Evîn Bûldan û bîranîn bi dawî bû.
