Mîkaîl Aslan dê 30 saliya hunera xwe bi bernameyeke taybet a bi navê “Dîdar” ku muzîkal e li Stenbolê pîroz bike.
Mîkaîl Aslan stranbêj ango hunermendekî navdar ê Kurd e. Ew ji bajarê Dêrsimê yê bakurê Kurdistanê ye. 30 sal in stranên Kirmanckî û Kurmancî ji bo guhdar û temaşevanan diafirîne û çêdike. Di nav gelê Kurd de gelek tê nasîn û xwedî cihekî qedirbilind e. Ew ê roja 27ê Nîsanê li Navenda Pêşandanê ya Bostnci ya Stenbolê bi boneya 30 saliya rêwîtiya hunera xwe şahiya bi navê “Dîdar” a muzîkal li dar bixe.
Wê gelek hunermendên binavûdeng jî di şeva promiyera “Dîdar” de cih bigirin. Stranbêj Beser Şahîn, Mem Ararat, Cem Erdost Îlerî, Erkan Ogur û Cemîl Qoçgirî wê wek mêvan beşdarî şevê bibin. Wê pişt re li gelek deverên din ên cîhanê jî ev şahiya “Dîdar” bê lidarxistin.
Mîkaîl Aslan di vê rêwîtiya xwe ya huner ango muzîkê ya 30 salan de albûmên wek “Agêrayîs, Miraz, Zernkut, Petag û Xoza” jî derxist. Mîkaîl Aslan sala bihûrî li gel Cemîl Qoçgirî ku bi armanca 20 sal in bi hev re dixebitin, albûma “RûbiRû” amade kiribûn û ji bo muzîkhezan belav kiribûn.
Niha jî stranbêj Mîkaîl Aslan bi “Dîdarê” rê li ber siberoja hunera xwe vedike.
Guhdar û temaşevan dikarin bilêtan li ser vê lînkê peyda bikin: https://biletinial.com/tr-tr/muzik/mikail-aslan-didar-neo-traditional-muzikal
