DEM Partiyê 3yê Gulanê Roja Azadiya Çapemeniyê ya Cîhanê pîroz kir û got ku ew rojnamegerên hatine kuştin bi bîr tînin û hemû rojnamegerên ji bo avakirina aştî û civaka demokratîk dixebitin silav dikin.
Cîgirê Hevserokên Giştî û Berpirsê Komîsyona Çapemeniyê ya DEM Partiyê Tayip Temel bi boneya 3yê Gulanê Roja Azadiya Çapemeniyê ya Cîhanî daxuyaniyek nivîskî belav kir.
Daxuyaniya bi sernavê “3yê Gulanê Roja Azadiya Çapemeniyê ya Cîhanî pîroz be” wiha ye:
“Roja 3yê Gulanê bi biryara Neteweyên Yekbûyî di sala 1993yan de weke “Roja Azadiya Çapemeniyê ya Cîhanî” hat qebûlkirin. Lê belê ev roj li Tirkiyeyê ji pîrozbahiyê dûr e. Zext û sansur, binçavkirin û girtinên keyfî, îşkence û qetilkirin li ser pîşeya rojnamegeriyê tehdîd e û derbeyeke giran li mafê nûçe wergirtinê yê gel dixe. Rojnamegerên ku rastiyê tînin ziman û hewl didin bibin dengê gel, yan tên bêdengkirin yan jî tên krîmînalîzekirin. Li gorî Endeksa Azadiya Çapemeniyê ya Cîhanî ya Rojnamegerên Sînornenas (RSF) Tirkiye di warê zext û êrişên li ser rojnamegeran de îsal di nava 180 welatan de daketiye rêza 159an.
Li Tirkiyeyê bi salan e rojnameger bi taybetî jî rojnamegerên mûxalîf û kurd tên bêdengkirin. Îro hîna jî bi dehan rojnameger di girtîgehan de ne. Carinan rasterast mafê jiyanê yê rojnamegeran tê hedefgirtin. Di 5 salên dawî de 15 rojnamevan di êrişên leşkerî yên li ser Herêma Kurdistanê û Rojava de hatine kuştin. Ev rojnameger ji ber ku sûcên şer, mirina sivîlan, kuştina jinan, koçberiya bi darê zorê, wêrankirin û rastiyên sansurê belge kirin, hatin hedefgirtin.
Li gel van hemû êrişan jî kevneşopiya çapemeniya azad û rojnamegerên ku mîrasgirên vê kevneşopiyê ne, ji ragihandina rastiyan re xwe paşde negirtine û kamera û mîkrofonên xwe ji bo azadî û demokrasiyê bi kar tînin. Weke Partiya DEMê em rojnamegerên ku di avakirina aştî û civaka demokratîk de erka xwe bi layiqî pêk tînin silav dikin. Em di serî de Metîn Goktepe, Gurbetellî Ersoz, Hrant Dînk, Apê Musa, Nagehan Akarsel, Nazim Daştan û Cîhan Bîlgîn û hemû şehîdên çapemeniya azad bi rêzdarî û minetdarî bi bîr tînin. Roja Azadiya Çapemeniyê ya Cîhanî li xebatkarên çapemeniya azad ên ku li pey heqîqetê dimeşin û bi her awayî mafê gel ê nûçe wergirtinê diparêzin pîroz be!”
