Gêrayîşê petrolî, viraştişê kalekol û birnayîşê daristanan, Koyê Gabarî de cayê cuyayîşî yê xezalan û peskovîyan çin keno.
5 serrî zêde ya xozaya Şirnexî bêmîyan yena qirkerdiş. Bi taybetî Koyê Gabarî hedef de yo. Destpêkê serranê 90î ra nata, gelek warê ci bi nameyê “herêma leşkerî” yenê qedexekerdiş. Gêrayîşê petrolî, viraştişê kalekol û birnayîşê daristanan, Koyê Gaberî de cayê cuyayîşî yê xezalan û peskovîyan çin keno.
Dîmenê xezalan ameyî antişî
Goreyê xebera MA’yî seba talankerdîşê xozayî, qadê cuyayîşî yê xezalan û peskovîyan ke bi çinbîyayîşî rî bi rî yê, înan zî çin benê. Dîmenê ke herême de ameyî antene, rewşa behsê xeberî hol nîşan danê. Wexto ke xezalî herême de gêrayî, dîmenê înan ameyî antiş. Dîmenan de aseno ke cayo ke xezalî tede ameyî antene, pêro darî ameyî birnayîş û xozayî rê zaf zirar resayo.
Serranê 90î ra nata qedexe yo
Koyê Gabarî yo ke berzîya ci 2 hezar û 144 metreyî ya, wayîrê yew ekosîstemêko zengîn o. Darê zeytûnan ra hetê çam û berûyan, xeylî tewirê daran uca de benê. Qoçê koyî de zî vaşê endemîkî estê. Hetê bînî ra zîndîyê sey pezkovî, luyî, çeqel, xezal û zaf tewirê milçikan zî uca de cuyenê.
Dewanê Zivinga Hecî Elî, Xurs, Hirareş, Basret, Miştexan, Dêrşew, Spîvyan, Deştalala, Meydîn, Aşilmê, Berêmîrê, Şerefiyê, Zivîng, Germê, Dêra Jor, Dêra Cêr, Awen û Bênat, Bertûl, Bunisra, Hezara û Biyadê yê ke binê Koyê Gabarî de yê, serranê 90î ra nata her tim bi baxaneyê “Herêma ewlehîya xususî” sîvîlan rê qedexe ameyî kerdîş. Dem bi dem welatî bi destûrê taybetî yê Walîyîya Şirnexî eşkenê şîrê dewanê xo.
