Li navçeyên Begirî û Ebexê ji bo statuya zimanê kurdî meş hat lidarxistin. Di meşê da perwerdehiya bi zimanê dayikê hat xwestin û banga xwedîderketina zimanê kurdî hat kirin.
Sazî, dezgeh û partiyên siyasî yên Kurd, ji bo zimanê kurdî bibe zimanê perwerdehiyê û xwedî statu bi dirûşma “statuya kurdî, perwerdehiya bi kurdî” çalakî li dar xist in. Çalakiya ku dê sibê bi li ser gora Ehmedê Xanî ya li navçeya Bazîd a Agiriyê bi dawî bibe, bi tevlibûna gelek kesan li navçeyên Bêgirî û Ebexê yên Wanê hat destpêkirin. Li her du navçeyan jî çalakvan bi dirûşmên “Bijî zimanê kurdî”, “Bê kurdî jiyan nabe”, “Kurd, kurdî, Kurdistan” hwd. û dowîzên “bê kurdî jiyan nabe”, “Kurd, kurdî, Kurdistan” meşiyan. Çalakvan, ewilî li navçeya Bêgiriyê di nava sukê de meşiyan û dûre derbasî navçeya Ebexê bûn. Çalakvanan li vir jî di nava sukê de meşiyan û piştre jî daxuyanî dan.
‘Her malekê bikin dibistaneke Kurdî’
Hevseroka Partiya Wekhevî û Demokrasiyê ya Gelan (DEM Partî) Gulşen Kûrt di daxuniyê de axivî û bal kişand ser “Banga Aştî û Civaka Demokratîk”. Gulşen Kûrt diyar kir ku ev bang ji bo statuya kurdî gelek girîng e û divê dewlet gav biavêje. Gulşen Kûrt, anî ziman ku ji bo xwedîderketina kurdî herî zêde bar dikeve li ser milên jinan û bi lêv kir ku divê jin xwedî li zimanê xwe derbikevin. Gulşen Kûrt, bi domdarî wiha got: “Bi salan e gelê kurd li dijî polîtîkayên asîmîlasyon û înkarê têdikoşe. Zimanê dayikê sembola wan, çanda wan, jiyana wan e. Divê gelê kurd vê nirxê biparêze û zindî bihêle. Kurdî zimanekî kevnar û dewlemend e, ji ber vê yekê divê em zimanê xwe yê dayikê zindî bihêlin û fêrî wan bikin. Ez ji vir bang li malbatên kurd dikim, divê em her malekê bikin dibistanek kurdî û zimanê kurdî fêrî zarokên xwe bikin.”
‘Nirxên neteweya Kurd nasbikin’
Dûre Hevberdevkê Komîsyona Ziman, Çand û Hunerê ya DEM Partiyê Heval Dilbihar axivî û wî jî “Banga Aştî û Civaka Demokratîk” a Rêberê Gelê Kurd Abdullah Ocalan bi bîr xist. Heval Dilbihar, da zanîn ku ew heta dawiyê li pişt vê bangê ne û wiha got: “Heke îro desthilat ziman, çand, nav, bajar, gund û welatê me qebûl neke, çawa dê aştî çêbibe? Ji bo aştiyek birûmet divê nirxên neteweyî yên gelê kurd werin naskirin.”
Çalakiya zimanê kurdî, dê sibê li navçeya Bazîdê ya Agiriyê berdewam bike. Wê çalakvan li têketina bajêr kom bibin û berê xwe bidin gora Ehmedê Xanî.
ş
