Bi pêşengiya MEBYA-DERê, Dayikên Aştiyê û rêxistinên DBPê û DEM Partî yên Şirnex û navçeyên wê bi wesileya Cejna Qurbanê serdana goristanan kirin.
Bi pêşengiya Komeleya Yekitî Çand Piştevanî û Alikariya bi Kesên Xizmên Xwe li Dergûşa Şaristaniyê Winda Kirine re (MEBYA-DER), Meclîsa Dayikên Aştiyê, rêxistinên Partiya Herêmên Demokratik (DBP), Partiya Wekhevî û Demokrasiyê ya Gelan (DEM Partî) ên Şirnex û navçeyên wê, Berdevka DEM Partiyê Aysegul Dogan, parlamenterê DEM Partiyê yê Şirnexê Mehmet Zekî Îrmez, bi minesebeta Cejna Qurbanê serdana goristanên Şirnex û navçeya Cizîrê kirin.
Girsê destpêke serdana Goristana Şirnexê kirin. Li goristanê ji bo cangoriyên azadiyê deqîqeyeke rêz girtin û dua xwendin. Li goristanê parlamenterê DEM Partî yê Şirnexê Mehmet Zekî Îrmez axivî û anî ziman ku wan serdana goristana kesên di jêrzemînên Cizîrê de hatine qetilkirin dikin û wiha got: “Hovitiya ku di jêrzemînên Cizîrê de pêkhat li tu cihê dinyayê pêknehat. Em jî li vir dibêjin, heta xewn û xeyalên wan pêkbînin têkoşîna xwe bidomînin. Pêvajoya bi banga birêz Abdullah Ocalan hatiyê destpêkirin piştgiriyê didin û heta ew pêvajo pêk were xebatên xwe bidomînin. Di vê pêvajoyê de divê edî xwîn nerije. Bila êdî dayik negirîn.”
Piştre jî girse derbasî navçeya Cizîrê bûn û li wir jî serdana goristana Banê Senefîs û Goristana Asrî kirin. Li wir jî dua hatin xwendin.
