Partiya BastA! ya Swîsreyê jî piştgirî da kampanyaya Forûma Aştî û Azadiyê ya Ewropayê (EFFP) ku ji bo serdana Rêberê Gelê Kurd Abdullah Ocalan hatibû destpêkirin.
Sekretera Giştî ya partiya BastA! ku li ser xeta ekolojîst, femînîst û sosyalîst e Franziska Stier bi navê partiya xwe tev li kampanyayê bû û daxwaza hevdîtina bi Rêberê Gelê Kurd Abdullah Ocalan re bi nameyekê ji Wezîrê Dadê yê Tirkiyeyê Yilmaz Tûnç re şand.
Di nameya ku 7ê Hezîrana 2025an de hate şandin, hat ragihandin ku banga “Aştî û Civaka Demokratîk” a ku Ocalan di 27ê Sibatê de kir, li qada navneteweyî gelekî deng vedaye.
Franziska Stierê anî ziman ku ev bang “Ji bo avakirina cîhaneke cihê jiyanê firsendeke dîrokî ye” û got: “Heta ku bi Birêz Ocalan re hevdîtinê nekin, em ê nikaribin fikrên wî bi awayekî xurt fêhm bikin”. Lewma xwest, hevdîtina bi Abdullah Ocalan re bê astengî pêk bîne.
Franziska Stierê got: “Ji bo paşeroja Tirkiye, Kurdistan û Rojhilata Navîn divê derfetên çareseriya wekhev û demokratîk bêne afirandin.”
