Şaxa ÎHDa Stenbolê li ber Girtîgeha Girtî ya Jinan a Bakirkoyê daxuyaniyek da çapemeniyê û ji bo girtiyên nexweş banga berdanê kir.
Şaxa Komeleya Mafên Mirovan (ÎHD) a Stenbolê di daxuyaniyê de diyar kir ku Paketa Darazê ya 10emîn a li Meclîsê hate qebûlkirin, bersiv neda bendewariyan. Komeleyê destnîşan kir ku bi taybetî ji bo berdana girtiyên nexweş divê gavên bi lez bêne avêtin.
Rêveberê ÎHDa Stenbolê Hasan Yavîş daxuyanî da û diyar kir ku guhertina hatiye kirin ‘li dijî pîvana wekheviyê ye’ û got, biryarên kêfî yên Saziya Tipa Edlî li pêşiya berdanê asteng e.
Yavîç got: “Girtiyên nexweş bi salan e ji sîstemeke înfazê ya adil bêpar in. Qanûna nû vê bê edaletiyê hîn giran dike.”
Hevseroka Giştî ya ÎHDê Eren Keskîn jî balk işand ser rewşa girtiyên nexweş û got ku bêyî li benda sererastkirina qanûnî bê sekinandin divê tavilê bêne berdan.
Eren Keskîn ragihand ku Fatma Tokmak a li Girtîgeha Bakirkoyê, li gel nexweşiya dil jî girtî ye û Hatîne Yildiz a 75 salî tenê ji ber ku pere ji xizmên xwe re şandiye li girtîgehê ye.
Eren Keskîn got: “Li gorî daneyên me hezar û 412 girtiyên nexweş hene. Em dixwazin girtiyên nexweş bi lez, bêyî pêwîstî bi qanûnê bê dîtin, tavilê bêne berdan.”
