Mustafa Saygi ê ku 31 sal berê hat binçavkirin, hîn winda ye. Dayikên Şemiyê ji bo aqûbeta Mustafa Saygi bê ronîkirin dîsa li Qada Galatasarayê kom bûn û daxuyanî dan çapemeniyê.
Dayikên Şemiyê/Mirovên Şemiyê ku her hefte li Qada Galatasarayê kom dibin, aqûbeta xizmên xwe yên di binçavan de hatin windakirin dipirsin. Ji bo kiryar bên darizandin di hefteya 1056an de kom bûn. Gelek kes beşdarî çalakiyê bûn. Malbatan qurnefîl û wêneyên xizmên xwe yên hatin windakirin hildan. Dayikên Şemiyê, di vê hefteyê de aqûbeta Mûstafa Saygi yê ku 31 sal berê li navçeya Pirsûs a Rihayê di binçavan de hat windakirin pirsîn.
Sekreterê Şaxa Komelaya Mafê Mirovan (ÎHD) a Stenbolê Jiyan Kaya çîroka Mustafa Saygî xwend û got: “Mûstafa Saygi yê 30 salî di 3ê Hezîrana 1994an de ji bo biçe Pirsûsê bi motorsikletê xwe ji malê derket. Di vegerê de li gundê Yogûrtçû yê li Pirsûsê, ji aliyê Tabûra 5mîn a Komando a di avahiya Karê Avê yê Dewletê de bicihbûyî ve hate rawestandin û binçavkirin. Malbata Mûstafa Saygi, roja ewil dema ji jê agahî nestendin li her derê lê geriyan. Gundiyê ku bi navê R.Y. ev agahî dan dayika Mûstafa Ayşe Saygi ‘Ez û Î.Ş. dema ji navçeyê vedigeriyan li ser rêya gundê Yogûrtçû leşkeran em rawestandin. Di heman demê de Mûstafa jî hatibû rawestandin. Li nasnameya me nerîn. Em berdan lê Mûstafa bernedan.’ Ji bilî vê du gundiyên li ber pez ji hevjîna Mûstafa Dûrsûn Saygî re gotine ku wan dîtiye ku leşkeran Mûstafa birine qerekola gundê Yogûrtçû.”
Jiyan Kaya, diyar kir ku dema malbata Mûstafa çûne qereqola gundê Yogûrtçû, qereqolê ji wan re gotiye ku Mûstafa Saygî li qaraqola navçeyê ye û lêpirsîna wî didome. Jiyan Kaya anî ziman ku dema Mûstafa venegeriya malê, malbatê li Serdozgeriya Komarê ya Pirsûsê gilî kirin û got: “Dozgerî, li ser daxwaznameyê rewşa Mûstafa ji Fermandariya Bajêr a Navendî dipirse. Fermandariya Bajêr a Navendî jî radigîne ku Mûstafa ne di bin çav de ye.”
DMMEyê biryara binpêkirina mafan da
Jiyan Kaya, destnîşan kir ku hemû hewldanên malbatê bêencam man û got: “Di Kanûna 2009an de, motorsîkleteke rizî û parçeyên hestiyan li mezraya Akdogan a gundê Bîlgîn ê li Pirsûsê ji aliyê defînegeran ve hate dîtin. Ev hestî radestî dozgeriyê hatin kirin. Saziya Tiba Edlî ya Stenbolê îdia kir ku hestî yên ajalan in. Ji ber vê sedemê, dozgeriyê di 7ê Nîsana 2010an de biryara “hewcedarî bi lêpirsînê nehatiye dîtin” da. Malbatê, ku nekarî ji çareseriyên hiqûqî yên navxweyî encam bigire, serî li Dadgeha Mafên Mirovan a Ewropayê (DMME) da. Di sala 2015’an de, DMME’yê biryar da ku Tirkiyeyê xala 2’yemîn a Peymana Mafên Mirovan a Ewropayê, ku mafê jiyanê rêk dixe, îhlal kiriye.”
Jiyan Kaya bibîr xist ku di ser windakirina Mûstafa re 31 sal derbas bû û wiha bi dawî kir: “Ji bo malbata Saygi dem rawestiya ye lê dewlet bi hinceta demborînê ve lêgerîna wan a ji bo edaletê paşguh dike. Çend sal derbas bibe jî em ê dîsa ji bo Mûstafa Saygi û hemû windahiyên xwe dev ji lêgerîna edaletê bernedin.”
Çalakî, bi danîna qurnefîlan li Qada Galatasaray ve bi dawî bû.
