Mêrdîn – Çemê Reş ku li navçeya Şemrexa Mêrdînê ye ji ber xemsariyê tije gilêş û gemar bûye. Tevî ku cihê seyranê ye jî kes ne paqij dike û ne jî lê xwedî derdikeve. Çem û seyrangeh ji çopê xuya nake.
Çemê Reş li navçeya Şemrexê ya Mêrdînê diherike. Di nav gelî û deviyan de diherike. Cihekî pirr xweş e. Hem ava wê xweşik e û hem jî sûlava wê xweşik e. Ev der di heman demê de cihê seyranê ye. Lê bê xwedî û bêkes hatiye hiştin. Der û dorên çem û nava çem tije poşet, şûşeyên avê yên plastîk, her cure gemar têde heye.
Qirêjkirin û gemara li ser avê û li qiraxê çem li aliyekî hemû xweşikiya vir têk biriye li aliyê din jî mirov nikarin ji ber bêhna genî li ber çem û binê daran bêhna xwe bidin.
Kî diçe wir seyrana xwe pêk tîne, çopa xwe li wir dihêle û ev çop hemû dikeve nava avê û qiraxê çem bi çopê tije bûye. Ava çem ji çopê xuya nake.
Şaredarî xemsar in
Tevî ku ev çem di nav sînorên navçeya Şemrexa Mêrdînê de diherike jî ne Şaredariya Bajarê Mezin a Mêrdînê ku ji aliyê qeyim ve hatiye desteserkirin ne jî Şaredariya Şemrexê çopê paqij nakin. Di vê çopa berhev bûye û qirêjiya çem de xemsariya rayedaran xwe nîşan dide. Tenê ne her du şaredarî, di heman demê de ekolojîst û saziyên xwe jî li hemberî vê rewşê xemsar tevdigerin.
Bêhna genî belav dibe
Ji bo nexweşî çênebe û li vî cihê seyrangehê bêhna genî belav nebe, dermankirin ango dezenfekte jî nayê kirin. Lewma bêhna genî li derdorê belav dibe.
‘Projeya çêkirina derdora çem disekine’
Me têkildarî mijarê xwe gihand Hevşaredara Şemrexê Kudret Uçuk û qirêjkirina çem jê pirsî. Kudret Uçuk destnîşan kir ku ew qirêjkirina çem ji nêz ve teqîb dikin û têkildarî mijara navborî wiha got: “Derfeta me nîn e. Em di hefteyekê de rojek du rojan paqij dikin. Lê dîsa jî ev yek têrê nake. Miletê me tê û qirêjî dikin. Divê miletê me jî baldar be. Me çend caran kontrol kir, lê me pêk neanî. Divê Şaredariya Bajarê Mezin a Mezin destekê bide me. Qeweta şaredariya me têrê nake. Beriya qeyim bê, me û şaredariya bajarê mezin xwest em derûdora wê çêbikin. Me projeyek xweşik ji bo çem amade kiriye. Projeya me disekine. Piştî qeyim hat proje sekinî. Lê niha derfeta me têr nake. Em jî wê qirêjî û çopê dibînin û em jî ji vê ne razî ne. Em dixwazin her kes baldar be û çopa xwe li derdorê nehêle.”
