Hevseroka Giştî ya DBPê Çîgdem Kiliçgun Uçar beriya meşê li pêş avahiya DBPê ya Amedê axivî û got: “Li gorî hiqûqa Tirkiyeyê û hiqûqa navneteweyî divê Birêz Ocalan azad bibe. Ji ber ku bi milyonan azadiya Ocalan dixwazin. Bi milyonan dixwazin tecrîd bi dawî bibe. Ji bo çareseriya demokratîk û aştiya mayinde divê Birêz Ocalan azad bibe.”
Bi pêşengiya Platforma Saziyên Demokratîk baskê “Meşa Çareseriya Demokratîk û Azadiyê” yê bakurê Kurdistanê li Amedê ya ber bi Enqereyê ve dest pê kir. Girseya gel li pêş avahiya Rêxistina DBPa Amedê ya li navçeya Rezanê kom bû. Hevserokên Giştî yên DBPê Keskîn Bayindir û Çîgdem Kiliçgun Ûçar, Hevserokê Kongreya Civaka Demokratîk (KCD) Berdan Ozturk, parlamenter û hevşaredarên DEM Partiyê, rêveberên DBPê û DEM Partiyê, aktîvîstên Tevgera Jinên Azad (TJA), Dayikên Aştiyê, nûnerên rêxistinên demokratîk û bi sedan welatî ber bi Qada Şêx Seîd ve dest bi meşê kirin. Welatiyan û siyasetmedaran pêşmalkên “Meşa Çareseriya Demokratîk û Azadiyê” li xwe kirin û dovîz û pankar vekirin. Lê polîsan meşê asteng kir û destûr nedan meş pêk were. Girseyê bênavber dirûşmên “Bijî berxwedana gelê Kurd”, “Bijî Serok Apo” û “Bijî berxwedana Rojava” berz kirin.
Girseyê li kuçeya DBPê daxuyanî da. Li ser navê girseyê û meşvanan Hevseroka Giştî ya DBPê Çîgdem Kiliçgun Ûçar daxuyanî da.
Li vî welatî Kurd hene
Çîgdem Kiliçgun Uçra anî ziman ku tevî hemû astengiya Midûriyeta Polîsan a Amedê gelê Kurd li têkoşîna Rojava xwedî derdikeve û wiha got: “Em li hemberî vê têkoşîna wan bi hurmetî bejna xwe ditewînin. Tirkiye bi çeteyên ku mirov nikare li rûyê wan binere hevkariyê dikin. Bi van çeteyan gefan li me dixwin. Em çima li vir in. Em ji bo çareseriya demokratîk û meşa azadiyê li vir in. Me di meha Sibatê de jî Meşa Azadiyê li dar xist. Me wê demê jî got li Tirkiyeyê pirsgirêka herî mezin pirsgirêka Kurd e. Hûn vê pirsgirêkê nebînin jî, nebihîzin jî û nizanibin jî ev pirsgirêk heye. Li vî welatî Kurd hene û li vî welatî pirsgirêka Kurd heye. Li vî welatî gelê berxwedêr gelê Kurd heye. Ji ber vê yekê em li vir in û ji ber vê yekê em dengê xwe bilind dikin.”
Bi wekaleta NATO û Tirkiye dîktatoriyek nû tê avakirin
Dema Çîgdem Kiliçgun diaxivî, axaftina wê bê bi dirûşma “Bijî berxwedana gelê Kurd” hat qutkirin. Piştî dirûşmeyê Çîgdem Kiliçgun Uçar dîsa axaftina xwe berdewam kir û wiha got: “Li Sûriyeyê bi wekalata NATO û Tirkiyeyê dîktatoriyek nû û şerîatek nû tê avakirin. Ji ber vê yekê em li vir in. HTŞ û ANS-MSO li dijî têkoşîna gelê kurd hezên ne rewa ne. Dewlet dibêje em ê bi yên rewa re li maseyê rûnên. Ji 2012an heta niha li Sûriyeyê hêza herî rewa Hêza Demokrasiyê ya Sûriyeyê ye. Hêza herî rewa, hêza ku bi têkoşîna kurda derketiye holê jiyan û vîna hevpar e. Rêveberiya Xweser a Rojava ye.
Bi milyonan azadiya birêz Ocalan dixwazin
Axaftina Çîgdem Kiliçgun Uçar bi dirûşma “Bijî Berxwedana Rojava” hat qutkirin. Çîgdem Kiliçgun dîsa axaftina xwe berdewam kir û got: “Hûn bi kesên ku sibê li Rojava çi bikin ne diyare re, bi çekan û şer hewl didin Rojava ji nûve saz bikin. Lê li aliyê din ji 2012an heta niha bi felsefeya Birêz Ocalan rêveberiyek nû û jiyanek nû tê avakirin. Li hemberî vê rêveberiyê ya ku rewatiya xwe winda dike Tirkiye ye, ANS e HTŞ ye. Li vî welatî vîna ku ji demokrasî, aştî û çareseriya demokratîk gavan paşve navêje heye. Li vir vîna ku di demokrasiyê de israr dike heye. Ev vîn diyar dike ku 26 sal li Îmraliyê tecrîd heye. Ev vîn diyar dike ku pêwiste Birêz Ocalan azad bibe. Divê li gorî hiqûqê birêz Ocalan azad bibe. Li gorûqa navneteweyî divê Azad bibe. Ji ber bi milyonan kes li pişta wî ye divê azad bibe. Divê hûn hiqûqa xwe pêk bînin. Bi milyonan kes dest ji vê vînê bernade. Bi milyonan kes li dijî tecrîdê li ber xwe didin û li ser piyan e. Ji ber ku çareseriya demokratîk ku milyonan kes li pişt wê ye dixwazin divê Birêz Ocalan azad bibe. Birêz Ocalan li vî welatî bû vîn û nûnerê aştiyê. Birêz Ocalan li her derê ji bo wî pêngavek hatiye destpêkirin. Ji bo çareseiya demokratik divê birêz Ocalan azad bibe. Divê hûn hiqûqa xwe pêk bînin. Divê li gorî hiqûq û destûra bingehîn birêz Ocalan azad bibe. Bi milyonan kes bi salan e ji bo azadiya Birêz Ocalan li kolanan doza azadiya Birêz Ocalan dike. Îro li Rojava ermenî, suryanî, kurd û ereb hemû bi hevre dijîn. Modelek ava kirine. Lê Tirkiye bi êrîşan dixwaze vê pergalê hilweşîne û têk bibe. Welatekî bifikirin êrîşî axa derveyî xwe dike. Çima ji bo Kurd nebin xwedî Statu. Binerin li Kurdistanê hemû gel yek e. Hûn nikarin Kurdên li Rojava û Kurdên bakur cuda bikin. Hûn nikarin bakur û başûr ji hev qut bikin. Ji ber vê yekê em li vir in. Heta vîna gelê me bê parastin emê tekoşîna xwe berdeam biki. Binerin Rojhilata Navîn bi salan e rastî şerên giran tê. Heta niha Nemrûd dîtin. Gelek dîktator hatin û çûn. Gelek zordest hatin û çûn. Lê yen li ber xwe didin li vir in û tekoşîna xwe berdewam dikin.
Vê îktîdarê rewatiya xwe winda kiriye. Li Tirkiyeyê û li Kurdistanê hemû hêzên demokratîk li ser piyan in. Mafê Kurdan ê berxwedanê mafê wan ê herî dewa ye. Meseleya Kurd meseleyeke ku êdî nayê taloqkirin e. Ez bang li hemû partiyên Kurdistanê dikim. Îro roj ne roja em têkoşîna xwe taloq bikin. Roj roja ku em têkoşina xwe bikin yek û ji bo aştiyek bi rûmet û jiyanek hevpar têbikoşin. Îro em li Amedê sibê li Rihayê û Edeneyê û roja din jî li Enqereyê em ê van gotinên xwe beredam bikin.”
Piştî daxuyaniyê meşvan ber bi Rihayê ve hatin oxirkirin. Meş wê sibê li Rihayê berdewam bike.
