Wan – Rêveberê ARSÎSAyê Cevdet Zîlanli ku di daxuyaniya li dijî êrîşa li ser malbata Kaya ya Stenbolê de axivî, bal kişand ser hişmendiya pergal û dewletê û da zanîn ku “Ew bi ti awayî vê êrîşê qebûl nakin û divê bi eşkere bê zanîn ku ev êrîşa li ser malbata Kurd, ne bûyereke takekesî ye û rûyê pergalekê nîşan dide.”
Malbata Kaya ku di 13ê tîrmehê de li Stenbolê ji ber ku muzîka Kurdî guhdarî dikin rastî êrîşa polîsan tên û di encama êrîşê de bi îşkenceyê 10 ferdên malbatê tên binçavkirin. Di nava malbatê de jineke ducanî jî hebû û polîsan pênek li zikê jinê da û jin û zarok niha di nexweşxaneyê de ne. Li gorî nûçeyan jiyana pitika malbata Kaya di xeterê de ye. Komeleya Çand û Zimanê Kurdî ya Arsîsayê ku li navçeya Erdîşa Wanê xebatên xwe dimeşînin, bi piştgiriya Komeleya Dayikên Aştiyê, MEBYA-DER, TUHAY-DER, DEM Partî û DBPê li dijî vê pêkanîna nîjadî li ber avahiya xwe daxuyanî da. Di daxuyaniyan de pankarta li ser “Zimanê Kurdî xeta me ya sor e, destên xwe jê vekişînin” hatibû nivîsîn, hat vekirin. Ji bilî endamên saziyê, nûnerên saziyên sivîl û partiyên siyasî jî tev li daxuyaniyê bûn.
‘Em ê li dijî vê hişmendiyê têbikoşin’
Rêveberê ARSÎSAyê Cevdet Zîlanli metna daxuyaniyê xwend û bal kişand ser qirêjiya bûyerê. Cevdet Zîlanli, da zanîn ku êrîşkirina bi vî rengî ya li ser jineke Kurd a ducanî, encama hişmendiya mêrperest û tundiya mêrane ya dewletê ye. Cevdet Zîlanli, anî ziman ku ew vê hişmendiya mêrane ya li dijî Kurdan û jinan bi ti awayî qebûl nakin û got: “Em vê êrîşê, weke êrîşeke li ser hemû jinên Kurd dihesibînin û em ê li dijî vê hişmendiyê ji bo ku hilweşe têbikoşîn.”
‘Em êrîşên bi vî rengî bi ti awayî qebûl nakin’
Cevdet Zîlanli, bal kişand ser êrîşa li ser zimanê Kurdî jî û wiha berdewam kir: “Êrîşkariya li ser ziman û muzîka Kurdî, di eslê xwe de êrîşkirina nasname û hebûna Kurdan e. Hişmendiya dijminane ya wan polîsan û pergala heyî vê yekê nîşanî me dide. Divê bi eşkere bê zanîn ku ev êrîşa li ser malbata Kurd, ne bûyereke takekesî ye û rûyê pergalekê nîşan dide. Em weke saziyên çand û zimanê Kurdî, êrîşên bi vî rengî bi ti awayî qebûl nakin û divê ev pergala cudakarî, tundî û bêtehemuliyê demildest bê guhertin. Di vê pêvajoyê de ji bo aştiyeke mayînde reform û guhertin bên kirin, gavên erênî li ser çand û zimanê Kurdî bê avêtin, statû û mafê perwerdehiya zimanê Kurdî bê naskirin.”
