Amed – Koçerên zozanên Hesendîkê her demsalên havînê pezê xwe tînin li vir diçêrînin û debara xwe bi sewalkariyê dikin. Koçer Yunus diyar kir ku ew demsala havînê tên zozên û heta demsala payizê li vir in û got: “Zozanê me dewlemend e. Ev zozan çavkaniya debara me ye.
Xwezaya Kurdistanê gelek dewlemend e. Di demsalên bihar û havînan de koçer berê xwe didin zozanan. Zozan parçeyekî çanda Kurdan e. Koçer li zozanan pezê xwe diçêrînin û li vir amadekariya zivistanê dikin. Hem mast, penêr çortan, rûn û gelek berhemên şîr hildiberînin. Bi qasî pêdiviyên xwe ji bo xwe cuda dikin. Yên din jî difiroşin. Koçer li vir hem sewalên xwe diçêrînin û hem jî bi berhemên şîrê pez, debara xwe dikin. Li navçeya Pasûra Amedê Zozanên Hesendînê yek ji wan zozanên herî dewlemend e. Bilindbûna zozan zêdetirî 3 hezar metre ye. Di aliyê av, giya û ajalan de pir dewlemend e. Koçer Yunus Altun ku her sal tê li zozanê Hesendînê sewalan xwedî dike li ser jiyana Zozanê Hesendînê ji ajansa me re axivî.
‘Debara me li ser vî zozanî ye’
Yunus Altûn diyar kir ku 6 gund û gelek gundik debara xwe li ser Zozanê Hesendîne dikin û got: “Bi salan e em tên vî zozanî. Em li gel sewalên xwe tên li vî zozanî jiyana xwe berdewam dikin. Em her sal demsala havînê tên li Zozanên Hesendînê dijîn. Ji aliyê avê ve pir dewlemend e. Em serê havînê tên vir û heta payîzê em li vir dijîn. Debara me li ser vî zozanî ye. Îro ji ber kanên madanê jiyana me di xeterê de ye. Zozan çavaniya me ya jiyanê ye. Ku jiyan li zozanan tune bibe, em ê koçî bajaran bikin. Jiyana me girêdayî vî zozanî ye. Welat her dem pir xweş e.”
‘Jiyana li vir di bin xeterê de ye’
Yunus Altûn destnîşan kir ku av ji bo wan gelek girîng e û ew tişt anî ziman: “Îro ava zozanê gelek kêm bûye. Ji ber ku li vir lêgerîna madanê dest pê kiriye. Em vê madanê naxwazin. Hem jiyana me hem jî jiyana ajalan di bin xeterê de ye. Nezî 400 mih û bizinê min hene. Dewar hene. Bi hezaran ajal li vir dijîn. Derdora me tev giha ye. Ajalên me tev li vir diçêrin. Em mast û penêrê xwe ji şîrê pez çêdikin. Em hemû amûr û alavên xwe li ser pişta hêstiran tînin vir. Welatê me gelek xweş e. Li vir gihayê Çatrî, gezgezik, kereng û sîr heye. Hemû ji bo nexweşiyan derman e. Xweza di aliyê giya û pinçar de gelek dewlemend e û dermanê tenduristiyê ye.”
