SOHRê ragihand ku ji ber êrişên li Siwêdayê heta niha hezar û 311 kes hatine qetilkirin û xwest ku ku der barê komkujiyan de lêpirsîneke navneteweyî were destpêkirin.
Ajansa Nûçeyan a Hawarê (ANHA) di nûçeya xwe de diyar kir ku Navenda Çavdêriya Mafên Mirovan a Sûriyeyê (SOHR) ragihandiye ku heta niha hezar û 311 kes di şer û pevçûnên li Siwêdayê û gundewarên wê de hatine kuştin û hate diyarkirin ku ji wan 196 kes li qadan hatine gulebarankirin.
Li gorî SOHRê hûrgiliyên bîlançoyê wiha ne:
* 637 kes ji xelkê Siwêdayê hatine qetilkirin; 104 jê sivîl in ku ji wan jî 6 zarok û 16 jî jin in.
* 456 kes endamên wezaretên parastinê û ewlekariya giştî yên hikumeta veguhêz in ku jê 32 kes ji eşîrên Bedewî û çekdarên lubnanî ne.
* 15 endam jî ji her du wezaretên hikumeta veguhêz di êrişên hewayî yên Îsraîlê de hatine kuştin.
* 3 kes di êrişa hewayî ya Îsraîlê ya li dijî avahiya Wezareta Parastinê de hatine kuştin.
* Rojnamevanek di pevçûnan de hatiye qetilkirin.
* 196 kes bi destê hêzên wezaretên parastinê û ya hundir, (28 jê jin, 8 zarok û kalemêrek) li meydanan hatin gulebarankirin.
* 3 kes ji eşîrên Bedewî, bi destê komên Durziyan hatin kuştin.
Her wiha SOHRê daxwaz kir ku bi rêya komîteyeke navneteweyî ya pispor lêpirsîneke navneteweyî ya serbixwe were destpêkirin da ku binpêkirin û sûcên li Siwêdayê hatine kirin bişopîne û ji sûcdarên ji her du aliyan hesab bixwaze.
