Amed – Aktîvîsta TJAyê Salîha Ayata ku têkildarî pêvajoya heyî axivî û derbarê gavneavêtina dewletê de wiha got: “Divê makezagon biguhere û Kurd di wê makezagonê de bên naskirin.”
Rêberê Gelê Kurd Abdullah Ocalan di 9ê Tîrmehê de di çarçoveya “Pêvajoya Aştî û Civaka Demokratîk” de bangeke nû ya dîrokî kir. Li ser vê yekê Koma “Aştî û Civaka Demokratîk” a ji 30 endamên PKKê pêk dihat di 11ê Tîrmehê de li Şikefta Caseneyê ya li bajarê Silêmaniyê merasîma şewitandina çekan li dar xist. Aktîvîsta Tevgera Jinên Azad (TJA) Salîha Ayata têkildarî banga Rêberê Gelê Kurd Abdullah Ocalan, merasîma şewitandina çekan a PKKê, gav neavêtina dewletê û rol û mîsyona jinan a di vê pêvajoyê de ji ajansa me re axivî.
‘Divê jin vî barê giran bigirin ser milêxwe’
Salîha Ayata diyar kir ku pêvajoyeke girîng dest pê kiriye û wiha got: “Îro li Rojhilata Navîn dîzayneke nû çêdibe lê Tevgera Azadiyê û Rêberê Gelê Kurd demekî dirêj e têkildarî vê yekê tespîtên girîng kirin. Pêşdîtinên Rêberê Gelê Kurd û tevgera azadiyê di vî warî de pir xurt bûn. Îro em encamên van pêşdîtinan dijîn. Bi pêşdîtinên Rêberê Gelê Kurd gelek gavên cuda û dîrokî tên avêtin. Ev yek vediguhere tişteke pir baş û destê kurdan saxlem bike. Sed sal in Kurd nikarin zimanê xwe biaxivin, çanda xwe hunera xwe bi dilê xwe biafirînin. Şerê kurdan ê herî mezin ew bû ku zemîneke siyasî çêbibe ku Kurd bikaribin mafên xwe biparêzin û li gorî vê jiyaneke wekhev û bi hev re ava bikin. Heke îro jiyaneke wekhev ava bibe divê bi destê jinê ava bibe. Divê jin vî barê giran bigirin ser milê xwe. Tevgera Jinên Kurd di vê pêvajoyê de barekî giran girtiyê ser mile xwe. Ev jî nîşan dide ku divê jin rol û mîsyoneke girîng bilîzin.”
‘Bi şewitandina çekan tê gotin ku em ji bo aştiyê amade ne’
Salîha Ayata bal kişand pêşengtiya jinan a di merasîma şewitandina çekan de û wiha domand: “Divê di her qada jiyanê de rengê jinê û destê jinê hebe. Ku bikaribe weke temsîlî edaletê jî pêk bîne. Ji ber wê jî ji min re pir ecêb nehat ku 15 jin 15 mêr tev li merasîmê bûn û pêşengtiya wê jinekê kiribe. Ji ber ku jin dixwaze şer bide rawestandin û jiyaneke wekhev ava bike. Îro em behsa avakirina jiyaneke nû dikin. Bi şewitandina çekan tê gotin ku em ji bo aştiyê amade ne. Agir dişewitîne diqedîne. Ji axê ji xweliyê afirandinek derdikeve holê.”
‘Rêbaza agir ji bo Kurdan bûye xelasiyek’
Salîha Ayata di berdewama axaftina xwe de ev tişt gotin: “Agir di nava Kurdan de tişteke wisa ye ku tu caran dawîbûn nîne. Destpêke jî çi dibe bila bibe ew tişt form diguherîne dibe tiştekî din. Dikare ji wê tişteke din biafirîne. Kurdan felsefeyeke ji mirinê mezintir ava kirin. Gelek berdelên giran dan. Bi felsefeya ji mirinê mezintir jiyaneke wekhev ava kirin. Ji ber vê ji Kawayê Hesinkar, ji Mazlûm Dogan bigire rêbaza agir ji bo Kurdan bûye xelasiyek. Ne qedandinek.”
‘Divê ji aliyê qanûnî ve mafên Kurdan bên naskirin’
Salîha Ayata derbarê gavneavêtina dewletê de jî wiha got: “Divê makezagon biguhere. Divê Kurd di wê makezagonê de bên naskirin. Kurd herin Meclisê siyaset bikin, polîtîkayê bi pêş bixin. Polîtîkayeke li gorî civaka exlaqî demokratîk, jiyana jinparêz, jiyaneke ekolojîk. Kurd nabêjin ez civakeke homojen a Kurd û sunî ava bikim. Kurd dibêjin ez mafên xwe dixwazim. Girêdayî vê mafên hemû gelan dixwazim. Ji ber vê divê di Meclisê de bin xwedî biryar bin di komîsyonê de jî xwedî gotin bin. Ji aliyê qanûnî ve mafên wan bên parastin. Divê ji bo vê jî gav werin avêtin. Bêyî gav avêtinê mirov nikare pêşiya xwe bibine. Ji bo ku bikarî ziman, çand û hunera xwe biparêzî gav lazim in. Gavên hiqûqî gelekî girîng in. Makezagon biguhere rewşa girtiyan, rewşa heyî ya li welat dê biguhere. Hewceye makezagon biguhere û ev biryar li Meclisê bên dayîn.”
