Zabitayanê Şaredarîya Konakî berê Komeleya Kultur û Ziwanî ya Awestayî mohr kerd. Hemserekê Komele Ramazan Kaygisizî da zanayene ke no proseso ke aştîye yena munaqaşekerdene de mohrkerdişê komeleya înan nîno qebulkerdene û wina va: “Mohrkerdişê komele manayê mohrkerdişê fekê kurdan o.”
Zabitayanê Şaredarîya Konakî ya Îzmîrî, ewro berê Komeleya Ziwanî ya Awestayî mohr kerd. Di rojî verê cû polîsan eştîbî komele ser û bi bexaneya ke ruhsatê komele çin o gefê girewtiş û mohrkerdişî wendîbî. Vîzîr zî zabitayî ameyîbî komele û dabi zanayene ke do ewro mohr bikerê. Saetanê sibayî ewro de 2 zabitayê şaredariya Konakî ameyî komele û berê komele mohr kerd.
Derheqê mohrkerdişî de Hemserekê Komeleya Ziwanî ya Awestayî Ramazan Kaygisizî, vera girewtişê komele reaksîyon nîşan da û wina va: “Wextê winayênî de ke prosesê aştîye yeno munaqaşekerdene, rayedaran ameyî komele mohr kerde. Bi nê mohrkerdişî, dewê şarê kurdî û ziwanê şarê kurdî mohr kerdî. Bi serran o şarê kurdî seba ziwanî têkoşîn dano. La dewlete heta nika cewabêko pozîtîf nêdayo waştişanê şarê kurdî.”
Ramazan Kaygisizî da zanayene ke sey Komeleya Ziwanî ya Awestayî, xeylê rey ardîbî ziwan ke ganî ziwanê kurdkî bibo ziwanê perwerdeyî û fermî û wina qisey kerd: “Ma wazenê ke kurdî zî sey heme şaranê dinya bi ziwanê xo perwerdeyê xo bivînê û bibê wayîrê ziwanê dayîke. Ganî heme saziyê cimatkî û pawitoxê heqanê merdiman zî paştî bidê nê waştişê ma û vera na yewe reaksîyonanê xo bîyarê ziwan.”
