Fermandariya Giştî ya Hêzên Ewlekariya Hundirîn a Bakur û Rojhilatê Sûriyeyê bi armanca xurtkirina ewlehiyê li Reqayê pêngava ewlehiyê da destpêkirin.
Fermandariya Giştî ya Hêzên Ewlekariya Hundirîn a Bakur û Rojhilatê Sûriyeyê daxuyanî da û pêngava ewlehiyê li Reqayê da destpêkirin. Fermandariyê aşkera kir ku ew ê li seranserî deverên Herêma Bakur û Rojhilatê Sûriyeyê pêngavên ewlehiyê yên berfireh bidin destpêkirin û di çend rojên bê de mizgîniyek baş bidin.
Fermandariyê di daxuyaniyê de anî ziman ku di encama salên dirêj ên şerê li Sûriyeyê de, kaos û bêîstîqrarî li seranserî welêt belav bûye, û li gelek herêman valahiyek ewlehiyê çêkiriye û wiha got: “Bê guman ev yek bandoreke neyînî li herêmên me yên Bakur û Rojhilatê Sûriyeyê kiriye. Ji ber ku em beşek yekgirtî ya vî welatî ne.”
Fermandariyê anî ziman ku ev rewşa xirab rê daye şaneyên terorîst ên DAIŞê ku çalakiyên xwe bi awayekî mezin vegerîne û wiha got: “Ev dihêlea ku xwe birêxistin bike û bendên Hêzên me û Hêzên Sûriya Demokratîk (HSD) li gelek bajar û bajarokan armanc bikin. Rê li ber bazirganên hişbirê yên ku di bin parastina rejîma berê ya Sûriyeyê de dixebitîn, vekir da ku bazirganiya xwe berfireh bikin û bigihêjin herêmên me yên Bakur û Rojhilatê Sûriyeyê. Girêdayî vê yekê, bûyerên takekesî yên kesên giyan xerab hene ku guleyên bêserûber diavêjin. Vê yekê rewşeke bêistiqrarî û neewlehiya welatiyan çêkiriye. Van kiryaran teşwîqek mezin di nava hêzên me de çêkir ku dest bi pêngavên ewlehî û leşkerî, zêdekirina ewlehiyê û bilindkirina amadekirinê bikin. Hêzên me mîna van pêngavan li gelek deveran da destpêkirin; ji wan pêngava paqijkirina başûrê Hesekê ye. Di wê pêngavê de gelek endamên vê şaneyên terorîst ên DAIŞ´ê hatin girtin, çek û cebilxane desteser kirin.
Piştre hêzên me amadekariyên pêngava ewlehiyê ya berfireh li kampa Holê ku wekî kampa herî xeternak a li ser rûyê erdê ye ku malbatên endamên DAIŞ’ê yên niha girtî ne, kirin. Hêzên me, Hêzên Ewlekariya Hundirîn a Jin û Yekîneyên Parastina Jin (YPJ) bi piştgirîya Hêzên Sûriya Demokratîk û Koalîsyona Navneteweyî tev li pêngavê bûn. Pêngavê du rojan dewam kir, tê de 11 endamên girêdayî vê rêxistina terorîst hatin girtin, her wekî din gelek şebeke û êriş dihatin amadekirin da ku êrişî herêmên me bikin, hatin bêbandorkirin.
Îro, em wek Fermandariya Giştî ya Hêzên Ewlekariya Hundirîn a Bakur û Rojhilatê Sûriyeyê destpêkirina pêngaveke nû li bajarê Reqayê radigihînin. Armanca vê pêngavê tesbîtkirina ewlehiyê û kesên sûcdar ên ku gelek tawan kirine radestî edaletê bikin. Ev operasyon dê bidiqet û profesioneleke mezin ji aliyê Hêzên me yên taybet H.A.T û Operasyonan were lidarxistin.
Em ji gelê xwe yê li Herêma Bakur û Rojhilatê Sûriyeyê re diyar dikin ku bi jiyana aştiyane û bi bîrdozî û nêzîkatiya neteweyeke demokratîk tê naskirin, piştrast dikin ku çawa me li Reqa, Dêrazorê û gelek deverên din bi fedakarî, mêrxasî û cesareteke mezin pişta rêxistina terorîst DAIŞ şikand, em ê li seranserî herêmên Bakur û Rojhilatê Sûriyeyê jî pêngavên ewlehiyê yên berfireh bidin destpêkirin. Em ê bi hemû hêza xwe li dijî terorê şer bikin û di rojên pêş de mizgîniyê bidin gelê xwe. Her wiha em aşkera dikin ku em ê heta serkeftinê rêya şehîdan bişopînin.”
