Wan – Hevserokê Şaxa TUHAY-DER a Wanê Osman Başak bal kişand ser rewşa girtîgehan û got: “Di pêvajoya ‘Aştî û Civaka Demokratîk’ de rewşa girtîgehan xerabtir bûye.”
Li girtîgehên li bakurê Kurdistan û Tirkiyeyê, rewşa girtîgehan siyasî tevî ku pêvajoya “Aştî û Civaka Demokratîk” dest pê kiriye jî ti guhertin çênebûne. Her ku diçe xerabtir dibe. Bi taybetî jî nêzîkbûna rayedaran, pêkanînên rêveberiyên girtîgehan, biryarên lijneyên çavderiyê ku berdana girtiyan asteng dike, rewşa girtîgehan radixe ber çavan. Tevî ku li Kurdistan û Tirkiyeyê pêvajoya “Aştî û Civaka Demokratîk” heye jî, ev pêkanîn di girtîgehan de her roj dibin sedema binpêkirina mafan.
Hevserokê Şaxa Komeleya Piştevaniya bi Malbatên Girtî û Hikûmxwaran re (TUHAY-DER) a Wanê Osman Başak ji Ajansa Welat re axivî. Osman Başak bal kişand ser pêvajoya “Aştî û Civaka Demokratîk” û xwest rewşa girtiyan bê başkirin.
Osman Başak, diyar kir ku Rêberê Gelê Kurd Abdullah Ocalan ji bo xwişk-biratiya gelan û civaka demokratîk di 27ê Sibatê de bangek kir. Osman Başak da zanîn ku di çarçoveya pêvajoyê gava çek şewitandinê jî hatiye avêtin û wiha got: “Vê yekê nermbûnekê bi xwe re anî û hinekî dilê gel jî xweş bû. Lê, mixabin ji aliyê dewletê ve hêj gaveke şênber û berbiçav nehatiye avêtin. Em weke komele serdana malbatên xwe yên girtî dikin û malbat ji pirsa, ‘Wê zarokên me kengî bên berdan’ dipirsin. Xûya ye ku di vî warî de hêviyeke mezin a malbatan heye. Lê belê, ji bilî berdana çend girtiyên nexweş ên temenên wan mezin, heta niha ti tişt nehatiye kirin. Ev lijneyên çavderiyê ku berdana girtiyan asteng dikin, xetereyeke mezin e û em biryar û pêkanînên wan napejirînin. Tevî pêvajoyê jî ev pêkanîn tên kirin û berdewam in.”
Zexten li ser girtiyan
Di berdewamiyê de Osman Başak bi bîr xist ku gelek girtiyên nexweş hene û derbarê sepanên li dijî wan girtiyan ev tişt gotin: “Nejdet Koç ku di zîndana Wanê de dimîne, di masûlkeyên xwe de felc bûye û nayê berdan. Her wiha Dawetî Tan hişê xwe winda kiriye, Findî Yacan 70 salî ye û nexweşiyên wî yên kronîk hene û Mûhammed Salîh Çîçek nexweşê çolyakê ye û nayên berdan. Ev tenê girtiyên li Wanê dimînin in, bi hezaran girtiyên wiha hene. Li Girtîgeha Tîpa S ya Antalyayê derabe danîne li ber şibakên qawişan û zextên giran li ser girtiyan heye. Divê di pêvajoyeke wiha de pêkanînên bi vî rengî nebe, lê belê di pêvajoyê de rewşa girtîgehan xerabtir bû.”
‘Ji bo aştiyeke mayînde avêtina gavan gelek girîng e’
Osman Başak di dawiya axaftina xwe de da zanîn ku ji bo gel xwedî li vê pêvajoyê derbikeve divê gavên şênber bên avêtin û got: “Gava gel bêbawer bû, piştgirî jî kêm dibe. Em bang li hemû aliyan dikin ku bila êdî xwîn neyê rijandin, biratiya gelan bê avakirin û deriyê zîndanan vebe. Her wiha divê gerilayên serê çiya jî karibin bên vir. Daxwaziyên gel ên gelenperî ev in û em jî tev li gelê dibin. Çend meh beriya niha behsa ‘qanûna torba’ kirin, lê ev yek jî vala derket. Malbatên girtiyan xemgîn bûn û bertek nîşanî polîtîkayên dewletê didin. Ev yek baweriya gel û malbatan dişkîne. Xwesteka me ji Komîsyona Xwîşk- Biratî, Demokrasî û Hevgirtina Mîllî ya Meclîsê ew e ku e ku bi gûhertina çend qanûnan girtî bên berdan. Ji bo aştiyeke mayînde avêtina gavan gelek girîng e.”
