Şêx Murşid El Xeznewî ke badê kiştişê pîyê xo hetê rejîmê BAAS’î ra Norweçî ra ageyrayo Vakur û Rojhelatê Sûrîye, derheqê îttîfaqê Kurdan de qisey kerd û va hêvîya ke ewro esta verê çin bîye.
Lajê Şêx Murşid Maşûq El Xeznewî yo ke 1ê Hezîrane 2005î de hetê rejîmê BAAS’î ra ame kiştene Şêx Murşid El Xeznewî, badê kiştişê pîyê xo Norweç ra ageyra Vakur û Rojhelatê Sûrîye û seba yewîya neteweyî ya Kurdan dest bi xebatan kerd. Xeznewî ke seba yewîya kurdan Fermandarê Pêroyî yê HSD’yî Mazlum Ebdî reyde qisey kerdo, Qamişlo û Derîk de têkilîyanê xo dewam keno. Xeznewî Ajansa Mezopotamya rê wina qisey kerd:
‘Hemê partîyî pozîtîf nêzdî bîyî’
Xeznewî derheqê têkilîyanê xo de wina vat: Verê reyna ma waşt ke nêzdîbîyayîşê Kurdîstanî xurt bibo. Ewro grûbê ke yewbînan rê dişmenîye kerdêne, reyna ameyî têhet. Ma bextêwar ê ke na rey têhet ameyî û qisey kerd. Îttîfaqî ser o qerar da û va ganî waştişê Kurdan Şamî de yew bo û yewîya xo bimojnê.
‘Kurdî sey verî nîyê’
Xeznewî qiseykerdişê xo de va ke Kurdî sey verî nîyê û nika şênê qerarê cuya xo bidê û wina dewam kerd: Verê ma rê zaf ferman ame nuştiş. Ma rojê zehmetî dîyî, îşkence dî. La ewro Kurdî polîtîk ê. Cinî-camêrd her ca de yê, polîtîka virazenê û seba Kurdan ameyoxêk awan kenê. Ewro çîyo ke kêmî yo îttîfaqê Kurdîstanî yo. Eke no îttîfaq bêro viraştene ma do karêko pîl bikerê.
‘Ganî ma pîya biciwîyê’
Xeznewî peynî de wina vat: Her kes ganî heqê xo bizano. Ganî heqê yewî ser o heqê bînî nêro hesabkerdiş. Zanyarê dînî na mesela de zaf muhîm ê. Ewro ma heqê yewbînan qebul bikerê, no nêyeno manaya ‘Ti zî ganî bibê sey mi’ no yeno manaya ‘Heqê to zî sey ê mi est ê.’ Ganî ma pîya biciwîyê.
