Enqere – Endamên Şandeya DEM Partiyê ya Îmraliyê Pervîn Bûldan û Mîthat Sancar derbarê hevdîtinên bi Hevserokên HDPê yên Giştî yên berê Fîgen Yuksekdag û Selahattîn Demirtaş de daxuyaniyeke nivîskî parvekirin û diyar kirin ku her du jî piştgiriya pêvajoyê dikin.
Endamên Şandeya Partiya Wekhevî û Demokrasiyê ya Gelan (DEM Partî) a Îmraliyê Pervîn Bûldan û Mîthat Sancar serdana Girtîgehên Edîrne û Kandirayê kirin û bi Hevserokên Partiya Demokratîk a Gelan (HDP) ên Giştî yên Berê Selahattîn Demîrtaş û Figen Yüksekdag, Hevşaredarê Bajarê Mezin ê Amedê yê berê Selçûk Mizrakli û parlamentera HDPê ya berê Semra Guzel re hevdîtin kirin. Şandeyê derbarê hevdîtinê de daxuyaniyeke nivîskî parvekir.
‘Girtîbûna hevalên me bêhiqûqî ye’
Daxuyaniya niviskî wiha ye: “Hevdîtinên me bi giranî li ser parvekirina agahiyên li ser pêvajoya aştiyê bûn. Selahattîn Demîrtaş piştgiriya xwe ya ji bo pêvajoyê anî ziman û diyar kir ku ew ji bo serkeftina pêvajoyê amade ye ku beşdariyê bike. Fîgen Yuksekdag jî bi lêv kir ku ew ji bo aştî û civakeke demokratîk hêvîdar e û piştgiriya pêvajoyê kir. Girtîbûna hevalên me bêhiqûqî ye. Daxwaz û bendewariya me ya lezgîn ew e ku ev neheqiya aşkere tavilê were rakirin û hevalên me bikaribin bi azadî beşdarî meşa aştî û demokrasiyê bibin. Di hevdîtinên ku pirr berhemdar derbas bûn de, hevalên me silav û hezkirina xwe ya germ ji her kesên ku piştgiriya pêvajoya aştî û civaka demokratik dikin re ragihandin.”
