Helbestvanê Kurd Arjen Arî di salvegera koçkirina xwe ya dawî de li ser gora xwe hate bibîranîn. Di bîranînê de hate gotin ku kuliyata ku Arjen Arî li pey xwe hişt ji bo gelê Kurd mîrasek e.
Helbestvanê Kurd Arjên Arî di 12ê Cotmeha 2012an de li Amedê ji ber nexweşiya penceşêrê jiyana xwe ji dest dabû. Arjen Arî di salvegera wefata xwe de li ser gora xwe ya Goristana Yenîkoya Amedê hate bibîranîn. Malbata Arjên Arî, nûnerên Weşanên Sor, nivîskar û nûnerên saziyên sivîl tev li bîranînê bûn. Li ser gora Arjên Arî find hatin pêxistin. Di bîranînê de kêliyek helbesta Arjên Arî hate xwendin û piştre nivîskar Berken Bereh û xwişka Arjên Arî Necla Akay axivîn.
‘Ew kuliyata ku li du xwe hişt, ji bo me mîrasek e’
Nivîskar Berken Bereh bal kişand ser nivîskariya Arjên Arî û mîrateya ku li du xwe hişt û wiha got: “Em bi çûyîna te xemgînin lê ew kuliyata te li du xwe hişt, ji bo me mîrasek e. Ez bawerim ew niha li cem Meleyê Cizîrî, Ehmedê Xanî, Cegerxwîn e. Çimkî wî jî dixwest bibe Cegerxwînê serdema modern.”
‘Ew ji vî welatî bû û birayê hemû Kurdan bû’
Xwîşka Arjên Arî Necla Akay jî bal kişand ser nivîs û helbestên Arjên Arî û got: “Me gelekî ji wî hez dikir. Lê ew tenê ne wek birayekî bû, ew ji vî welatî bû û birayê hemû Kurdan bû. Yên ku dixwazin Kurdî bijîn û bixwînin, dikarin viya di helbestên Arjen Arî de bibînin. Ev 13 sal in derbas bûn, lê ka em nizanin hê çend salên din em ê bê te bijîn. Ez bawerim ku gelek tiştên wê bikirina hebûn lê axir nebû.”
