Înîsîyatîfa Yekîtiya Demokratîk ku têkildarî Roja Kobanê ya Cîhanê daxuyanî da diyar kir ku berxwedana Kobanê, di dîroka Kurd û Kurdistanê de warê şînbûna yekîtiya neteweyî ye û got: “Çawa ku Kobanê, duh warê vejîna yekîtiyê bû, îro jî têkoşîn û hewla yekîtiyê hêza xwe ji sekna gelê Kobanê û Rojava digire.”
Înîsiyatîfa Yekîtiya Demokratîk bi minasebeta 1ê Mijdarê Roja Kobanê ya Cîhanê de bi serenavê “Roja Kobanêyê ya Cîhanê Li Hemû Gelan Pîroz be!” daxuyaniyeke nivîskî weşand.
Înîsiyatîfa Yekîtiya Demokratîk da zanîn ku ji sala 2011an heta van mehên dawî li Sûriyeyê koçberî û qetlîam tu car kêm nebûn û wiha got: “Bajar hatin rûxandin, bi mîlyonan Sûrîyeyî koçber bûn, bi sed hezaran mirovên sivîl hatin qetilkirin. Di nava vê aloziyê de DAIŞ bi hevkariya hin hêzên navneteweyî û herêmî derket holê û 11 sal berê ji Mûsilê heta Reqayê gelek bajar û gundên Iraq û Sûriyeyê bi dest xistin. Artêşa tarîtiyê ya DAÎŞê li Rojhilata Navîn bêyî astengî di Îlona 2014an de dest bi êrîşa Kobanê kir.”
‘Kirasê koletiyê veçirandin’
Înîsiyatîfa Yekîtiya Demokratîk diyar kir ku DAIŞê di sedsala 21emîn de li ber çavên cîhanê li ser gelen Rojhilata Navîn hovîtiyeke mezin meşand, komkujiyên giran pêk anîn û wiha domand: “Bêguman armanca DAÎŞê, şikandina hêviya azadiyê ya gelan bû. Hin hêzên tarî bi destê DAIŞê xwestin ku berxwedana azadiyê ya gelê Kurd tune bikin. Lê 11 sal berê hemû êrîşên li dijî gelan li ber deriyê Kobanê bi têkoşîneke bêhempa yek bi yek têk çûn. Di serî de keç û xortên Kurd, hemû gelan bi hev re 4 meh 8 rojan li ber xwe dan û kirasê koletiyê veçirandin.”
‘Dilê her Kurdekî li Kobanê lê dide’
Înîsiyatîfa Yekîtiya Demokratîk destnîşan kir ku berxwedana Kobanê, di dîroka Kurd û Kurdistanê de warê şînbûna yekîtiyê ya neteweyî ye û wiha pê de çû: “Ji Mehabad heta Hewlêrê, ji Amedê heta Efrînê, ji Japonyayê heta Amerîkayê dilê her Kurdekî li Kobanê lê dide. Çawa ku Kobanê, duh warê vejîna yekîtiyê bû, îro jî têkoşîn û hewla yekîtiyê hêza xwe ji sekna gelê Kobanê û Rojava digire. Ji ber vê ye ku di pergala nû ya Sûriyeyê de parastina statuya Rojava tenê ne ji bo gelê Kurd, ji bo siberojeke demokratîk a hemû gelan daxwazeke jêveneger e.”
‘Kobanê serfiraziya hemû gelan e’
Înîsiyatîfa Yekîtiya Demokratîk di berdewama daxuyaniya xwe de ev tişt gotin: “Kobanê di heman demê de serfiraziya hemû gelan, baweriyan û jinan e. Kobanê bi têkoşîna xwe ya bêhampa, îro remza nirxên mirovahiyê ye, sembola jiyaneke bi rûmet e, qada xwişk û biratiya gelan e. Çîrûska rizgariyê li wir bi dirûşmeya ‘Jin, Jiyan, Azadî’ veda û hê jî li seranserê cîhanê deng dide. Ji ber van sedeman 1ê Mijdarê ji aliyê gelên cîhanê, rewşenbîr, şoreşger, rêxistinên civakî yên sivîl û xelatgirên Nobelê weke Roja Kobanê hat ragihandin.
Di qonaxa îroyîn de li Rojhilata Navîn daxwaza gelan êdî bidawîbûna şer û pevçûnan e. Divê hemû hêzên navneteweyî û herêmî rêz li daxwazên gelê Kurd û gelên din bigirin û bendewariyên ji bo azadî û aştiyê êdî paşguh nekin. Bi taybetî, li seranserê Sûriyeyê avakirina pergaleke demokratîk ji bo hemû gelan pêwistiyeke jiyanî ye. Bi vê mebestê, modela ku li Bakûr û Rojhilatê Sûriyeyê bi awayekî pirnasname û pirolî hatiya avakirin mînakeke berbiçav e.”
‘Divê gavên entegrasyona demokratîk werin avêtin’
Înîsiyatîfa Yekîtiya Demokratîk di dawiya daxuyaniya xwe de wiha got: “Em bang li Hikumeta demkî ya Sûriyeyê dikin ku di serî de Kurd, Durzî, Ereb, Elewî û Mesihî divê tu kes di pergala nû ya Sûriyeyê de tune neyên hesibandin. Di vê çarçoveyê de divê dev ji hemû polîtîkayên pişaftin û helandinê were berdan û gavên entegrasyona demokratîk werin avêtin. Lewra li Sûriyeyê û li hemû Rojhilata Navîn, siberojeke xweştir encax bi helwesteke aştiyane û demokratîk pêkan e.”
Bi van hest û nêrînan, em cardin ruhê azadiyê ku 11 sal berê li dijî êrîşên DAIŞa hov li dora Kobanê kom bûbû bi rêzdarî silav dikin û 1ê Mijdarê Roja Kobanêyê ya Cîhanê pîroz dikin.”
