Beşdarên Nobeta Edaletê ya li hember destdirêjiya li ser zarokan pêk tê bang li gelê Cizîrê kirin ku ew tevlî danişîna ku dê 20ê mijdarê pêk were bibin û piştgiriyê bidin doza zarokan.
Nobeta Edaletê ya ku ji aliyê Şaxa Egîtîm Senê ya Şirnexê ve li dijî destdirêjiya li ser zarokan û xerakirina cezayê Bûrak Ercan ê destdirêjî li ser 34 zarokên li Cizîrê pêk anîbû di hefteya 5emîn de bi dawî bû. Parlamentera DEM Partiyê ya Şirnex Newroz Ûysal Aslan, endamên Tevgera Jinên Azad (TJA) rêveberên partiyên siyasî û saziyên civaka sivîl tevlî nobeta edaletê ya li Kolana Hunerê ya navçeya Cizîrê ya Şirnex tê girtin bûn.
Parlamenter Newroz Ûysal Aslan di nobetê debal kişand ser bêcezatiya kesên destdirêjiyê li ser zarokan dike û wiha axivî: “Em dikarin bibêjin ji bo zarokan, ji bo civakê hemûyê bê edaletê hatiye ferzkirin. 20ê mehê danişîn ê pêk were, em jî dê tevlî vê dozê bibin û xwedî li zarokên xwe derkevin. Her bûyera ku pêk tê zarok, jin û civakê dike hedef.”
Aktîvîsta Tevgera Jinên Azad Çîmen Fîdan jî diyar kir ku destdirêjiya li ser zarokan û êrîşên li ser jinan ji êrîşên li ser civakê pêk tê ne qut in û ew hêza xwe ji zihniyeta desthilatdariyê digirin.
Endamê Egîtîm-Senê Mesût Aslan di dawiyê de axivî û da zanîn ku ew îro nobeta edaletê bi dawî dikin, lê têkoşîna wan dê berdewam bike û wiha axivî: “Vaye 5 hefte ne em di nobeta edaletê de ne û ev nobet ji bo zarokên me bû. Em bang li gelê xwe dikin ku ji bo parastina zarokan xwedî li dozê derkevin û tevlî danişîna ku dê 20ê Mijdarê pekoe were bibin.”
