Wan – Jinên siyasetmedar ên Wanê li ser 25ê Mijdarê axivîn û bal kişandin ser têkoşînan jinan û gotin: “Azadiya me jinan divê ne girêdayî mêran, pergalan an jî dewletan be, lazim e em jin xwe bi xwe azad bikin.”
Li Kurdistan û Tirkiyeyê jin 25ê Mijdarê Roja Têkoşîna li Dijî Tundiya Li Ser Jinan her sal bi kuştin û destdirêjiya li dijî jinan pêşwazî dikin. Tundiya li dijî jinan sal bi sal zêdetir dibe û rê li ber pirsgirêkan vedike. Li gorî daneyan ji Mijdara 2024an heta niha 281 jin hatine kuştin, 295 jinan jî bi awayekî bi guman jiyana xwe ji dest dane. Li gorî saziyên jinan ji sedî 35ê jinan ji aliyê mêrên ku pê re zewicîbûn, ji sedî 65ê wan jî di mala xwe de hatine kuştin. Jinên siyasetmedar ên Wanê derbarê 25ê Mijdarê de axivîn û bal kişandin ser têkoşîna jinan a li dijî tundiyê.
‘Divê em mafên xwe bizanibin’
Rêvebera Partiya Herêmên Demokratîk (DBP) ya Navçeya Tûşbayê ya Wanê Zeynep Yucedagê da zanîn ku li ser jinan zilmeke mezin heye û diyar kir ku bi zanebûn zilmê dikin ku jinan nezan bihêlin. Zeynep Yucedagê anî ziman ku heke jin nezan be, dê malbat jî, zarok jî, civak jî nezan be û got: “Lewma, zalim jî xwe li ser nezaniyê ava dikin. Polîtîkayên hemû cîhanê li ser vê esasê dimeşin û wisa hatiye avakirin. Dixwazin jin li malê bin, tiştekî nezanin û hîn nebin, tenê bila bi gotina wan bikin. Heq û hiqûqeke jinê li cîhanê nîn e. Lewma divê jin werin cem hev, mafên xwe bizanibin, hev biparêzin û li hev xwedî derbikevin.”
‘Divê jin xwe perwerde bikin’
Zeynep Yucedagê bi lêv kir ku divê jin xwe perwerde bikin û bixwînin. Zeynep Yucedagê diyar kir ku divê jin hertim di nava lêpirsînê de bin û ev tişt anî ziman: “Divê bipirsin ‘em kî ne, heq û heqûqa me çiye?’ Divê em jin xwe li ser esasê zanebûnê perwerde bikin da ku bikaribin polîtîkayên li ser me tên meşandin têk bibin. Jin dikarin biçin TJAyê û li ser mafên jinan agahiyan bigirin.”
‘Ji bo azadiya xwe li benda ti kesî nebin’
Aktîvîsta TJAyê Perîhan Sogukkulakê jî daxwaz kir ku êdî jin neyên kuştin û rastî destdirêjiyê neyên. Perîhan Sogukkulakê diyar kir ku jiyana cîhanê û mirovahiyê li ser jinê hatiye avakirin û wiha pê de çû: “Heke jin azad nebe, civak jî azad nabe û mirovekî neazad nikare mafê xwe biparêze. Azadiya me jinan divê ne girêdayî mêran, pergalan an jî dewletan be, lazim e em jin xwe azad bikin û em xwe bi rê ve bibin. Divê em ji bo azadiya xwe li benda ti kesî nebin. Her wiha ez tenê azad bim têrê nake, divê em derdorê xwe jî azad bikin.”
‘Bi saya serê Serokatî ye’
Perîhan Sogukkulakê destnîşan kir ku roj nîne agahiya kuştinê an jî destdirêjiyê neyê. Perîhan Sogukkulakê anî ziman ku ew bi vê yekê gelekî xemgîn in û wiha dawî li axaftina xwe anî: “Ji bo pêşîlêgirtina kuştin û destdirêjiyê xebat lazim e, divê em derdorê xwe birêxistin bikin. Niha jinên Kurd li ber xwe didin, doza azadiya xwe dikin. Ev yek jî bi saya serê Serokatî Abdullah Ocalan e. Ne tenê jin, divê hemû civak bê birêxistinkirin. Divê em hev û du perwerde bikin da ku em bigehijin azadiya xwe.”
