Amed – Huseyîn Bag ku li Girtîgeha Sûlûca ya Edeneyê tê ragirtin da zanîn ku li girtîgehê gelek mafên wan tên binpêkirin û diyar kir ku pirtûkên ku navên Kurd û Kurdistanê tê de derbas dibin nadin wan.
Li girtîgehên Tirkiyeyê û bakurê Kurdistanê zext û binpêkirinên mafan berdewam dikin û her ku diçe zêdetir dibin. Yek ji van girtîgehan jî Girtîgeha Ewlehiya Bilind a Hejmara 1ê ya Sûlûca ya Edeneyê ye. Girtî Huseyîn Bag ku 10 sal in girtî ye û niha di Girtîgeha Sûlûcayê de tê ragirtin, roja Şemiyê bi telefonê bi malbata xwe re axivî, binpêkirinên mafan ên li girtîgehê ragihandin.
‘Ligel DAÎŞ, edlî û FETOyiyan bi cih dikin’
Girtî Huseyîn Bag destnîşan kir ku odeyên wan û girtiyên din li heman korîdoran in û wiha got “Em li avahiyeke sê qat dimînin, qatekê em lê dimînin, qatekê DAIŞî dimînin, di qata biniya wan de jî FETOyî dimînin. Hemû korîdorên me wisa lê kirine. An ku me li gel DAIŞiyan, edliyan, FETOyiyan bi cih dikin. Nahêlin odeyên me li gel hev bin. Dema em sedemê wê dipirsin jî ji me re dibêjin ‘polîtîkaya me ya girtîgehê wiha ye. Hûn werin gel hevdû hûn ê çalakiyan bikin.’ Van tiştan weke hincet nîşan didin.”
Tevî ku pirtûk ne qedexe ne jî nadin wan
Huseyîn Bag da zanîn ku pirtûkên ku navên Kurd û Kurdistanê tê de derbas dibin nadin wan û wiha domand “Gelek girtîgehan van pirtûkan didin lê li vê girtîgehê nadin. Gelek qedexe hene. Pirtûk jî ne qedexe ne, ne jî biryara komkirina wan heye. Lê dema peyva Kurd, Kurdistan derbas dibe an jî hinek polîtîk be qedexe dikin. Rojnameya Yenî Yaşamê jî nadin me. Wê jî bi hinceta ku rojname girêdayî Saziya Îlanê ya Çapemeniyê nîne nadin.”
‘Kameraya ku li odeyê bi cih kiriye her derê dibîne’
Huseyîn Bag diyar kir ku li odeya lê dimîni kamera bi cih kirine û wiha pê de çû “Ji ber kamera li odeya me dinêre me pêşiya wê girt. Bi hinceta ku me zirar daye kamerayê derbarê me hemûyan de çar caran cezayê ragihandinê birîn. Mînak nêzî çar mehan cezayê ku bi telefonê neaxivin û nikarin nameyan bişînin dane min. Hêj jî kamera li odeyê ye. Li her derê dibîne. Ji ber vê yekê em werzîşê jî nakin. Cezayên cûr bi cûr ên dîsiplînê li gelek hevalan birîn. Wekî din carna jî dema diçin nexweşxaneyê dema pêkanîna ‘lêgerîna nava dev’ qebûl nakin jî nabin nexweşxaneyê û cezayê dîsiplînê tê dayîn. Dema dibin jî mûayeneya bi kelemçe li me tê ferzkirin.”
Huseyîn Bag da zanîn ku li hemberî van pêkanînên girtîgehê serî li gelek saziyan dane.
‘Tevî pêvajoyê jî zextên li ser girtiyan zêdetir dibin’
Biraziya Huseyîn Bag Meral Bagê jî diyar kir ku li dijî van binpêkirinên girtîgehê serî li gelek saziyan, partiyan û rêveberiya girtîgehê dane û wiha got “Tevî pêvajoya çareseriyê jî zexta li ser girtiyên me zêdetir dibin. Di pêvajoyeke wisa de ku hêviya aştiyê zêde bûye, rêveberiyên girtîgehan zextê li girtiyan dikin. Em dixwazin ev zext bi dawî bibin.”
‘Peyvên Kurd û Kurdistan qedexe ne’
Meral Bagê diyar kir ku beriya çar mehan ji apê xwe re pirtûk şandin lê girtîgehê pirtûk nedan apê wê û ev tişt gotin “Ji ber ku di nava pirtûkan de peyvên Kurd û Kurdistan derbas dibin dibêjin ‘qedexe ye.’ Peyva Kurdistanê ne qedexe ye di dîrokê de jî derbas dibe. Dema em ji girtîgehên din re dişînin digirin lê li vê girtîgehê nagirin. Çend caran em li girtîgehê jî geriyan lê pirtûk negirtin.”
‘Li dijî binpêkirinên mafan ên li girtîgehan bêdeng nemînin’
Meral Bagê bang li rayagiştî kir ku li dijî binpêkirinên mafan ên li girtîgehan bêdeng nemîne û axaftina xwe wiha bi dawî kir “Divê li dijî van binpêkirinan em weke civak bêdeng nemînin. Em dixwazin Komeleya Mafên Mirovan (ÎHD), partiyên siyasî û sazî û dezgehên hiqûqê bi van binpêkirinan re eleqedar bibin û ev binpêkirinên mafan bi dawî bibin.”
