Ji ber ba, bahoz û baranên mûsonê li başûr û başûrrojhilatê Asyayê lehî rabû û hezaz çebû. Di encama vê karesatê de zêdetirî hezar û 800 kesan mirin.
Li Endonezya, Srî Lanka, Malezya, Tayland û Vîetnamê ji ber ba, bahoz û baranên mûsonê lehî rabû û hezaz çebû. Zêdetirî hezar û 800 kes mirin, bi deh hezaran kes jî ji cih û warên xwe bûn.
Li sê eyaletan 950 kesan jiyana xwe ji dest dan
Li Girava Sumatra ya Endonezyayê bîlanço giran dibe. Ajansa Rêveberiya Afetê ya Neteweyî (BNPB) ragihand ku ji ber lehî û hezaza li sê eyaletan 950 kesan jiyana xwe ji dest dan, 5 hezar kes birîndar bûn û 274 kes jî winda ne. Her wiha ziyan li gelek mal, rê û binesaziya cemaweriyê bû.
Li gorî rayedaran tenê li van sê eyaletan maliyeta avakirinê dibe ku 3,1 milyar dolar be.
Li Acehê jî 386 kesan jiyana xwe ji dest dan
Aceh ku di sala 2004an de tsunamiyê zirareke mezin gihîştê, di vê felaketê de yek ji wan herêman bû ku bandora herî giran lê bû. Li eyaletê 386 kesan jiyana xwe ji dest dan, bi sed hezaran mirov hatin veguhestin.
Waliyê Acehê Muzakir Manaf diyar kir ku li herêmê valahiyeke cidî ya personelên tenduristiyê heye û got: “Pêwîstiya me bi her tiştî heye, bi taybetî bi doktoran. Derman girîng e, lê belê malzemeyên pêwîstiyên bingehîn jî girîng e.”
Krîza avhêwayê baranê zêde dike
Demsala mûsonê ji bo tevahiya Asyayê di warê çandiniyê de gelekî girîng jî be dibe sedema lehiyên hilweşîner. Li gorî pisporan, krîza avhewayê baranê zêde dike; germabûna okyanûsan jî bahozên tropîkal xurt dike. Li Endonezyayê hawirdorparêz dibêjin para tinekirina daristanan di lehî û hezazên ji nişka ve mezin e.
Bahozê bandor li zêdeyî 2 milyon kesî kir
Li Srî Lankayê ji ber bahoza Ditwahê 627 kesan jiyana xwe ji dest dan. Artêşê ji bo piştgiriya li herêmên felaketê hejmara personelê xwe yên li qadê bi du qatî zêde kir. Li welêt bahozê bandor li zêdeyî 2 milyon kesî kir.
Hilweşîna herî mezin li herêma navîn a welêt bû ku çay lê tê çandin; li vê derê 471 kes mirin.
Serokdewletê Srî Lankayê Anura Kumara Dissanayake felaketa heyî weke “Yek ji felaketên xwezayî yên herî giran ên welêt” pênase kir.
Bandora felaketê li herêmê dewam dike.
