Di meşa ku li Qamişlo û Hesekê ji bo piştgiriya YPJê hate lidarxistin de, helwesta Hikûmeta Demkî ya Sûriyeyê ya li hemberî jinan hate şermezarkirin û peyama “Em rejîma vîna jinan nas nake, qebûl nakin” hate dayîn.
Di çarçoveya qampanyaya navneteweyî bi navê “Em Hemû YPJ ne” de, ji bo piştgiriya bi Yekîneyên Parastina Jin (YPJ) re û naskirina statûya wê li Qamişloyê meşek hate lidarxistin. Gelê Qamişlo, Dêrik û Tirbespiyê, bi dehan şervan û fermandarên YPJê, rewşenbîr û nûnerên rêxistinên jinan tevlî meşê bûn. Meşa ku ji Çerxerêya Sonî dest pê kir, li Qada Şehîdan veguherî mîtîngê. Li vir Endama Koordînasyona Kongra Starê Gulîstan Gulo axivî û silav da rêxistinên ku li Ewropayê piştgiriyê didin pêngavê.
‘Hikûmeta Demkî vîna jinan paşguh dike’
Gulîstan Gulo, bertek nîşanî nêzîkatiya Hikûmeta Demkî ya Sûriyeyê da û wiha got: “Me 14 salan ji bo avakirina Sûriyeyeke demokratîk û rûxandina rejîma Baasê ya welat wêran kir û mafên jinan binpê kir, têkoşîn meşand. Hikûmeta Demkî zextan li ser jinan zêdetir dike, rol û vîna wan paşguh dike. Meclisên Gel ên ku çend roj berê hatin avakirin, ji vîna gel û jinan gelekî dûr in. Em van biryar û nêzîkatiyan qebûl nakin.”
‘Em jî rejîmê qebûl nakin’
Gulo destnîşan kir ku li şûna Hikûmeta Demkî spasiya YPJê bike, wê nas nake û wiha dewam kir: “Hikumeta demkî, li şûna ku spasiya YPJ’ê bike û wan xelat bike, dibêje ku ew YPJa li dijî DAIŞê şer kiriye û bedel daye nas nake. Em jî diyar dikin ku em vê rejîmê qebûl nakin û ew nikare nûnertiya civaka me û jinan bike.”
‘Mafê jinan wê di destûra nû de bê mîsogerkirin’
Piştre ji fermandarên YPJê Rohilat Efrîn axivî. Efrînê destnîşan kir ku wan soza xwe ya parastina xakê ya ku roja destpêkê dabûn şehîdan û malbatên wan bi cih aniye. Efrînê diyar kir ku çalakiyên ku ji bo piştgiriya pêngavê tên lidarxistin cihê serbilindiyê ne û anî ziman ku ev ne tenê meşek e, ev li hemberî bêedaletî, newekhevî û pêkhateyên ku dixwazin hêzeke pêşeng di nava tarîtiyê de bihêlin, helwestek e.
‘Pêşketin dê bi têkoşênê pêk bê’
Fermandar Rohilat Efrîn bang li tevahiya gel kir ku li hemberî vê zîhniyetê serî netewînin û got: “Dema ku Komara Sûriyeyê nû hate avakirin, mafê jinan ê perwerde, rêveberî û cihgirtina di saziyan de hebû. Ev ne tiştekî nû ye, berê jî pêk hatiye û wê niha jî dewam bike. Jinên Sûriyeyî di nava artêşê de jî cihê xwe girtibûn. Ji ber vê yekê em radigihînin ku mafên jinan wê di destûra nû ya Sûriyeyê de bên mîsogerkirin û ev yek jî wê bi têkoşîna jinan û civakê pêk were.”
Piştî xwendina helbestan a ji bo piştgiriya YPJê, meş bi diruşmeyên “Bijî YPJ” û “Jin, Jiyan, Azadî” bi dawî bû.
Hesekê
Bi heman armancî bi sedan şêniyên bajarên Hesekê, Til Temir, Dirbêsiyê û Zirganê, koçberên Serêkaniyê yên li kampên Waşûkanî û Serêkaniyê jî ji bo piştgiriya YPJ‘ê meşek li bajarê Hesekê li dar xist.
Meş bi pêşengiya Kongra Star ji Çerxerêya Kevokê ya taxa Til Hecer dest pê kir û heta ber bi Çerxerêya Şehîd Serhed a taxa Miftî domiya. Di meşê de alên YPJ‘ê hatin hildan, pankart hatin vekirin û dirûşmên ‘Bijî berxwedana YPJ‘ê’, ‘Jin, Jiyan, Azadî’ û ‘YPJ‘ê hebûn, rûmet û nasnameya me ye’ hatin berzkirin.
Meş li Çerxerêya Şehîd Serhed veguherî mîtîngê. Li vir deqeyek rêz hat girtin, piştre berdevka YPJ‘ê Rûksen Mihemed axivî.
Rûksen Mihemed diyar kir ku YPJ li ser felsefeya ‘Jin, Jiyan, Azadî’ ava bûye û wiha got: “YPJê ku xwe dispêre îradeya azad, ji hemû jinan re bûye stargeh.”
Rûksen Mihemed destnîşan kir ku Şoreşa Rojava bi şoreşa jinan tê naskirin, pirrengiya civaka Sûriyeyê nîşan daye, çanda xweparastinê di nav jinan de xurt kiriye û got ku dê têkoşîna azadî, edalet û wekheviyê bidomînin.
Ji rêveberên Meclisa Kongra Star a bajarê Til Temirê Senaa Tamir jî anî ziman ku aramiya li herêma Bakur û Rojhilatê Sûriyeyê girêdayî rola pêşeng a jinan di sepandina rêgezên wekhevî, azadî û mafên jinan de ye û xwest rola jinan di avakirina artêşê de çalak be.
Mîtîng bi berzkirina dirûşmên silavkirina YPJ‘ê bi dawî bû.
