Amed-Derhêner Miral Kilo têkildarî fîlmê xwe yê bi navê ‘Li Baxçeyê Me Dareke Zeytûnê Hebû’ ku di Festîvala Fîlman a Amedê de hat pêşkeşkirin diyar kir ku ew dixwazin bi rêya sînemayê daxwazên xwe bînin ziman û got: “Min jî xwest bi rêya fîlmê ‘Li Baxçeyê Me Dareke Zeytûnê Hebû’ çîroka Efrîniyan parve bikim.”
Festîvala Fîlman a Amedê ya 3yemîn bi mazûvaniya Şaredariya Bajarê Mezin a Amedê û bi organîzetoriya Komeleya Akademiya Sînemayê ya Rojhilata Navîn û Sinebîrê di navbera 7-14ê Kanûnê de tê lidarxistin. Li her aliyên Kurdistanê û Tirkiyeyê bi dehan derhêner û çêker tev li festîvalê dibin. Derhênerê Rojavayî Miral Kilo jî bi fîlmê xwe yê ‘Li Baxçeyê Me Dareke Zeytûnê Hebû’ tev li festîvalê bû. Fîlmê ‘Li Baxçeyê Me Dareke Zeytûnê Hebû’ li ser çîroka Efrîniyan e. Derhêner Miral Kilo têkildarî fîlmê xwe yê ‘Li Baxçeyê Me Dareke Zeytûnê Hebû’ û çanda kurdî ji Ajana Welat (AW) re axivî.
‘Çîrokên girîng bi rêya fîlman tên nîşandan’
Miral Kilo destnîşan kir ku ev festîval ji bo derhênerên Kurd girîng e û ev tişt anî ziman: “Festîvala Fîlman a Amedê piştî demeke dirêj dîsa tê lidarxistin. Ev cihê serbilindiyeyê. Îro çîrokên girîng bi rêya fîlman tên nîşandan. Huner û çand ji bo fîlman girîng e. Armanca me jî ew e ku em çîrokên gelê xwe bi zimanê xwe bînin ziman. Gelek salan zimanê kurdî hat qedexekirin, destûr nehat dayîn ku em êşên xwe bi rêya fîlman parvebikin. Em îro êşên xwe bi zimanê dayîkê parvedikin.”
‘Em dixwazin bi rêya sînemayê daxwazên xwe bînin ziman’
Miral Kilo diyar kir ku fîlmên Kurdî li ser çanda Kurdî bandor dike û got: “Em gelekî aştîxwaz in. Em bi rêya hunerê dixwazin mafê xwe bînin ziman. Em di pêvajoyeke zor û zehmet de ne lê em dizanin ku sînema jî xebateke ji bo çanda kurdî ye. Em dixwazin bi rêya sînemayê daxwazên xwe bînin ziman. Festîval jî ji bo me gelek girîng e ji ber ku bi zimanê kurdî tê lidarxistin. Hatina min Amedê wek xewnekî bû. Gotinek li Ewropayê tê gotin: ‘Sûrên Fransayê hunera Ewropayê diparêze.’ Dema ku ez hatim Amedê min dît ku Sûrên Amedê jî hunera Kurdî diparêzin.”
‘Min jî xwest bi rêya fîlmê çîroka Efrîniyan parve bikim’
Miral Kilo anî ziman ku fîlmê ‘Li Baxçeyê Me Dareke Zeytûnê Hebû’ çîroka gelê Efrînê yê û axaftina xwe wiha bi dawî kir: “Ez jî ji Rojavayê me. Em ji kîjan parçeyê Kurdistanê bin jî çîrokên me yek in. Dema ku êriş li ser Efrînê pêk hat, me li cîhanê tu deng nebihîst. Min jî got ‘çima tiştên kul i Efrînê pêk dihatin di nûçeyan de cih negirtin.’ Ji bona wê min jî xwest bi rêya fîlmê ‘Li Baxçeyê Me Dareke Zeytûnê Hebû’ çîroka Efrîniyan parve bikim.”
