Serokdewletê DYA Donald Trump ferman da ku artêşa Amerîkayê ketin û derketine hemû tankerên petrolê ji bo Venezûelayê bê qedexekirin. Trump hikûmeta Venezûelayê jî wekî “rêxistina terorê ya biyanî” pênase kir. Li hemberî vê yekê Serokdewletê Venezûelayê Nicolas Maduro jî bi daxuyaniyekê ev yek wekî êrişek emperyalîzma DYAyê nirxand û got ku dê mafên serweriya xwe biparêzin.
Rageşiya di navbera Dewletên Yekbûyî yên Amerîkayê (DYA) û Venezûelayê de hindî diçe zêde dibe. Piştî DYAyê hêzên xwe yên behrÊ li Behra Karayîp û peravên Venezûelayê bi cih kirin, niha jî fermanekê ketin û derketine hemû tankerên petrolê ji bo Wenezûeyê qedexe kir. Trump di parvekirina xwe ya li ser platforma sanal a bi navê Truth Socîalê de îdîa kir ku Maduro dahata ji petrolê bi dest dixe ji bo karên îlegal xerc dike. Trump idîa kir ku ev çavkanî ji bo teror, bazirganiya madeyên hişbir, bazirganiya mirovan û cînayetên cur bi cur bi kar tîne.
Maduro û hikûmet di ‘lîsteya terorê’ de ne
Trump ku ev demek e Moduro û hikûmeta Venezûelayê bi firotina madeyên hişbir tawanbar dike, gavên nû avêtin û hikûmeta Venezûelayê wekî, “Rêxistina terorê ya biyanî” pênase kir. Trump piştî hikûmeta Venezûelayê mîna xiste lîsteya terorê daxuyand ku ev gav di serî de petrol û ax ji bo “Nirxên Amerîkayê yên hatine dizîn” paşve bistînin, hatine avêtin. Di parvekirinê de hate angaştin ku Amerîka dê hem nirxên hatine dizîn paşve bigire û hem jî talûkeyên li dijî DYAyê asteng bike.
Bijarteka leşkerî li ser maseyê ye
Di parvekirinê de Trump gefên destwerdanek leşkerî jî xwar û ev tişt gotin: “Venezûela ji hêla hêza behrî ya herî mezin a dîroka Başûrê Amerîkayê ve hate dorpêçkirin. Venezûela heta petrol, ax û nirxên din ên ji me dizîn paşve nede dê şoqek di dîrokê de nehatiye dîtin, bijî.” Piştî daxuyaniya Trump di piyaseya petrolê de fiyet serobino bû. Çav li rê ye di dema pêş de li gorî pêşketinan pêlên xurtir li bihayê petrolê bikeve.
Venezûela: Em serweriya xwe biparêzin
Li hemberî vê yekê Serokdewletê Venezûelayê Nicolas Maduro jî bi daxuyaniyekê ev yek wekî êrişek emperyalîzma DYAyê nirxand û got ku dê mafên serweriya xwe biparêzin. Hikûmeta Venezûelayê bi boneya van pêkanîn û gefan bi daxwaznameyekê giliya DYAyê li Serokatiya Demê ya Konseya Ewlehiyê ya Neteweyên Yekbûyî (NY) kir. Di daxwaznameyê de hate diyarkirin ku Washingtonê li Deryaya Karayîp tankerek petrolê ya Venezûelayê desteser kiriye û hiqûqa navneteweyî binpêkiriye. Ev kirina DYAyê wekî korsaniyê hate binavkirin.
