Platforma Şaxan a KESKê ya Amedê têkildarî budçeya 2026an daxuyanî da. Hevseroka BESê Guneş Ozel diyar kir ku budçe tê wateya xîzanî û bêewlehiyê û got: “Di budçeyê de ji bo gel tu tişt tune ye. Em wekî KESKê vê budçeyê qebûl nakin.”
Li Meclisa Tirkiyeyê hevdîtinên budçeya 2026an berdewam dikin. Platforma Şaxan a KESKê ya Amedê têkildarî budçeya 2026an bi şîara “Kedkar vê budçeyê qebûl nakin” li pêşiya avahiya Darayî ya Amedê daxuyanî da. Endam û rêveberên şaxên girêdayî KESKê yên Amedê û gelek kedkar tev li daxuyaniyê bûn. Girse pankarta “Kedkar vê budçeyê qebûl nakin” vekirin û dirûşmeya “Em ji xîzaniyê re serî natewînin” hate berz kirin.
‘Budçe tê wateya xîzanî û bêewlehiyê’
Daxuyanî ji aliyê Hevseroka Sendîkaya Kedkarên Buroyê Guneş Ozel ve hate xwendin. Guneş Ozel wiha got: “Li Meclîsê hevdîtinên budçeya 2026an hebû lê me dît ku desthilat tenê gelên Tirkiyeyê egle dike. Desthilat dibêje em karkeran di bin enflasyonê de nahêlin. Lê ev tişt ne rast e nîşana vê jî budçe ye. Em dibînin ku budçe tê wateya xîzanî û bêewlehiyê. Di vê budçeyê de karkerên cemaweriyê, malnişîn, jin, ciwan, xwendekar, karker û ciwan tune ne. Em wekî KESKê vê budçeyê qebûl nakin. Em dixwazin tu kes bi nanoziko nejî. Em Tirkiyeyek bi ewle dixwazin. Em dixwazin ku divê herkes li dijî vê budçeyê derkeve. Têkoşîna me ya ‘ji bo gel budçe û Tirkiyekê demokratîk’ dê berdewam bike. Em budçe û mûçeyek mirovî dixwazin. Di komkirina bacê de wekhevî tune ye, em wekehviya bacê dixwazin. Divê baceyên me ji bo aştî, adalet, perwerdehî û demokrasiyê werin bikaranîn.”
