Parlamentera DEM Partî Sabahat Erdogan Saritaş diyar kir ku ji 70 milyar budçeya Wezareta Çand û Turîzmê tenê sedî 5 ji bo bajarên Bakurê Kurdistanê hatiyê veqetandin û bertek nişan da.
Hevdîtinên pêşniyarên budçeya Wezareta Çand û Turîzme berdewam dikin. Parlamentera Partiya Wekhevî û Demokrasiyê ya Gelan (DEM Partî) a Merdînê Berîtan Guneş Altin bi lêv kir ku zimanên li Tirkiyeyê ber bi windabûnê ne û wiha axivî: “Li Cizîrê Mala Dengbêjan ku dîrokî ye û bi salan mazuvaniya çanda Kurdî kiriye niha xebatên wê hatine sekinandin. Dîsa li Cizîrê Birca Belek heye ew dîrok niha ji bo ofisa Seroka Baskê Jinan a AKPê ya berê Hatîce Altin tê bikaranîn. Hûn dibêjin em avahiyên dîrokî diparêzin. Lê ji bo zimanan jî cihekariyê dikin dibêjin divê tenê bi tirkî be. Her wiha bi bendavan dîrok tê hilweşandin û hûn jî berpirsin.”
Parlamenterê DEM Partiyê yê Îdirê Yilmaz Hûn jî destnîşan kir ku xebatkarên turizmê 14 seatan dixebitin û got ku keda karkeran tê xwarin. Yilmaz Hûn wiha dirêjî da axaftina xwe: “Wezareta Çand û Turîzmê bi rastî li ser yek nasnameyekê sekiniye, rastiya pirzimanî û pirçandî ya Anatoliyê paşguh kiriye. Di bin navê ‘çanda neteweyî’de, zimanên wekî Kurdî, zaravayê Zazakî, zimanên Ermenî, Lazî, Suryanî û Erebî têne paşguhkirin. Polîtîkayên pişaftinê li dijî cemxaneyên Elewî û Bektaşî bi navendê ve girêdidin, qedexeyên li ser konserên hunermendên Kurd û dozên li dijî hunermendên ku bi Kurdî stranan dibêjin – ev ne siyaseta çandî ne, lê endezyariya çandî ne. Wesayeta hikûmetê nikare li ser ziman, bawerî û çanda gel were damezrandin.”
Parlamenterê DEM Partî yê Mêrdînê George Aslan jî destnîşan kir ku ji bilî nasnameya tirkîtiyê nasnameyên din tune tên hesibandin. George Aslan anî ziman ku çand û dîroka gelan tên binpêkirin û got ku ev binpêkirin ji ber polîtikayên dewletê pêk tê.
Ji bo bajarên Bakurê Kurdistanê sedî 5 budçe
Parlamentera DEM Partî Sabahat Erdogan Saritaş diyar kir ku ji 70 milyar budçeya Wezareta Çand û Turîzmê tenê sedî 5 ji bo bajarên Bakurê Kurdistanê hatiye veqetandin û ev tişt gotin: “Ev budçe vê yekê ji me re dibêje: Dînamîkên civatek pirçandî nayên qebûlkirin. Ji ber ku niyeta demokratîkkirina çavkaniyan tune ye, armanc ew e ku li derveyî siyaseta çandî ya navendî tu nasname, ziman û çand neyê qebûlkirin. Hûn îdia dikin ku çandê neteweyî dikin, lê çanda neteweyî tenê bi temsîliyeta wekhev a hemû gelan, hemû zimanan û hemû nasnameyan mimkun e. Lêbelê, ev budçe wekheviyê çênake; ew înkarkirinê bi xwe re tîne.”
