Amed – Welatiyên ku tev li civîna gel ya li navçeya Sûrê bûn diyar kirin ku ew ji bo azadiya Rêberê Gelê Kurd Abdullah Ocalan tev li civînê bûn û gotin: “Heta ku Serokê me azad nebe, em jî azad nabin.”
Rêberê Gelê Kurd Abdullah Ocalan ku pêvajoya Aştî û Civaka Demokratîk da destpêkirin, li ser qanûnên azadiyê û aştiyê disekine. Di rojeva gelê Kurd de azadiya Abdullah Ocalan heye. Gelê Kurd di her şahî, çalakî û bernameyan de azadiya Abdullah Ocalan destnîşan dike. Her kes dibêje heke ku Ocalan di nav şert û mercên azad dikare bi rol û rista xwe ya pêkanîna aştiyê û çareseriyê rabe.
Du hefte ye li bajar û navçeyên Bakurê Kurdistanê civînên gel ên pêvajoya Aştî û Civaka Demokratîk tên lidarxistin. Di her civînan de daxwaza azadiya Ocalan tê kirin.
Bi hezaran welatî tev li van civînan bûn û banga azadkirina Ocalan û qebûlkirina daxwazên gelê Kurd dikin.
‘Heta ku Serokê me azad nebe em jî azad nabin’
Welatiyên Amedê ku tev li civîna gel a li navçeya Sûrê bûn ji ajansa me re axivîn û bal kişandin ser azadiya Ocalan. Welatiyan diyar kir ku Rêberê Gelê Kurd Abdullah Ocalan û gelê Kurd ji bo aştiyê her tiştî dike. Welatiyan anî ziman ku wan barê aştî û azadiyê dane ser milê xwe û divê êdî dewlet jî li gorî vê gavan biavêjê û gotin: “Em ji bo Serokê xwe li vir in, heta ku Serokê me azad nebe, em jî azad nabin.”
