Mamosteyê Çapemeniya Azad rojnameger û nivîskar Huseyîn Aykol ji aliyê şagirt, hevrê û hezkiriyên xwe ve li Goristana Karşiyakayê hate definkirin.
Mamosteyê Çapemeniya Azad Huseyîn Aykol ku di 14ê Cotmeha 2025an de li mala xwe ya Enqereyê xwîn çûbû ser mejiyê wî û ji wê rojê û vir ve li nexweşxaneyê dihat tedawîkirin, şeva sersalê jiyana xwe ji dest da. Ji bo Huseyîn Aykol li eywana Yılmaz Guney a navçeya Çankayayê merasîma oxirkirinê hat lidarxistin. Piştî merasîma bîranînê, li Goristana Karşiyaka ya navçeya Yenîmahalle nimêja cenaze hate kirin. Malbat û xebatkarên Çapemeniya Azad ên hevalên Huseyîn Aykol, Komeleya Rojnamegeran a Dîcle Firatê (DFG), Komeleya Rojnamegerên Jin ên Mezopotamyayê (MKG) heval û hezkiriyên Aykol, Hevserokê Giştî yê Partiya Wekhevî û Demokrasiyê ya Gelan (DEM Partî) Tuncer Bakirhan û endam û nûnerên saziyên sivîl û partiyên siyasî tev li mrasîma oxirkirina cenaze bûn. Piştî nimêja cenaze, cenazeyê Huseyîn Aykol ji aliyê bi hezaran kesan ve hate definkirin.
Huseyîn Aykol di koça xwe ya dawî de li ser milê heval û şagirtên xwe ber bi gorê ve hate birin û hate veşartin.
Xweliya Kobanê li ser tirbeya wî reşandin
Xweliya ku ji bajarê Kobanê ji bo li ser gora Huseyîn Aykol bê belavkirin hatibû şandin jî li ser gorê hate reşandin. Her wiha wêneyê Huseyîn Aykol, rojnameya Yenî Yaşamê û qerenfîl li ser gorê hatin danîn.
‘Em ê xwedî li mîrateya wî derkevin’
Piştî veşartina cenaze Hevserokê DFGê Selman Çîçek axivî û bi lêv kir ku Huseyîn Aykol tev li karwanê nemiran ê Çapemeniya Azad bû û got ku ew dê têkoşîna wî ya heqîqetê bidomînin û xwedî li mîrateya wî derbikevin.
Di merasîma veşartina cenaze de dirûşmeyên, “Şehîd namirin” û “Bijî şoreş û sosyalîzm” hatin berzkirin.
Bîranîn bi danîna qerefnîlên li ser gorê bi dawî bû.
Girse bi du merasîmê re derbasî cihê şînê li Şaxa ÎHDê ya Enqereyê bû û dê ji bo sê rojan şîn li vir bidome.
