Yekîtiya Jinên Kurd û Yekîtiya Jinên Herêma Federe ya Kurdistanê derbarê êrişên li ser Kurdan daxuyanî dan. Jin di daxuyaniyê de bal kişandin ser Rojhilatê Kurdistanê û êrişên bi ser taxên Şêx Mexsûd, Eşrefiyê û Benî Zêd.
Yekîtiya Jinên Kurd û Yekîtiya Jinên Herêma Kurdistanê, têkildarî rola pêşeng a jinên di xwepêşandanên li Îranê û berxwedana li Taxên Şêx Mexsûd, Eşrefiyê û Benî Zêd de daxuyanî dan. Di daxuyaniyê de êrişên li dijî taxên Şêx Meqsûd û Eşrefiyê û Benî Zêd ên li Sûriyeyê û Rojhilatê Kurdistanê hatin şermezarkirin û wiha hate gotin: “Em wek rêxistinên jinê Kurd di ferqê de ne kul i seranserê Kurdistanê gef û êriş li ser Kurdan tên pêkanîn. Jinên Kurd ji mafê diyarkirina çarenûsa gel û azadiyê bawer dikin. Em parastina rûmeta mirovahiyê û mafê bingehîn di rêza herî pêş de dibînin. Em piştgirî didin têkoşîna rewa ya gelê xwe û tu hêz nikare dengê azadiyê bêdeng bike. Îradeya gel ji her cûreyê zextê xurttir e.”
Xwepêşandan her diçe li pêş dikeve
Di daxuyaniyê de hate diyarkirin ku li Îranê ji 28ê Kanûna 2026ê heta niha êrişên rejîmê her zêde bûn. Li gelek bajaran xwepêşandan jî li dijî van êrişan xurttir û germtir bûn. Hat destnîşankirin ku Îran ji ber mudaxeleyên Amerîka û Îsraîl xwepêşandêran tewambar dike û êrişên ser gel zêdetir dike.
Pêşengên xwepêşandanê jin in
Di daxuyaniyê de hat diyarkirin ku li zanîngehan, di nava kampusên zanîngehan de û li kolanan jin bi awayeke çalak beşdarî çalakiyan dibin û wiha hat gotin: “Jin di xwepêşandanan de rola navendî dilîzin û diruşmeyên ‘Jin, Jiyan, Azadî’ berz dikin. Di rojên dawî de bi taybetî jinên aktivîst birîndar dibin û tên binçavkirin.”
Bêtir Kurd rastî êrişan dibin û dibin hedef
Di daxuyaniyê de hat ragihandin ku hêzên Îranê li herêmên Kurdan çekên giran bikar tînin lewma kuştî û birîndar çêdibin. Herî dawî hate destnîşankirin ku tiştên tên jiyîn li ser gelê li Rojhilat û Rojava bandorek giran dike, gel li dijî şert û mercên dijwar, bertekên xwe nîşan didin.
